На пасяджэнне Рады міністраў замежных спраў Арганізацыі бяспекі і супрацы ў Еўропе замест памерлага 26 лістапада Уладзіміра Макея паедзе пастаянны прадстаўнік Беларусі пры АБСЕ ў Вене Андрэй Дапкюнас, паведамляе «Белсат» са спасылкай на прэс-сакратара польскага МЗС Лукаша Ясіну.
Андрэй Дапкюнас. Фота: wmeste.by
Пасяджэнне Рады міністраў замежных спраў АБСЕ адбудзецца 1—2 снежня ў польскім горадзе Лодзь.
«На пасяджэнні АБСЕ ў Лодзі Беларусь будзе прадстаўляць Андрэй Дапкюнас — сталы прадстаўнік пры АБСЕ ў Вене», — паведаміў Лукаш Ясіна.
Андрэй Дапкюнас займаў пасаду намесніка міністра замежных спраў Беларусі з 2017 па 2020 год. У ліпені 2020 года ён быў прызначаны паслом Беларусі ў Аўстрыі і Славеніі, а таксама пастаянным прадстаўніком Беларусі пры міжнародных арганізацыях у Вене і пры Арганізацыі па бяспецы і супрацоўніцтве ў Еўропе (АБСЕ).
Раней міністр замежных спраў Польшчы Збігнеў Рау і генеральны сакратар АБСЕ Хельга Шмід пацвердзілі звесткі, што памерлы 26 лістапада кіраўнік МЗС Беларусі Уладзімір Макей мусіў на наступным тыдні прыняць удзел у пасяджэнні Рады міністраў замежных спраў АБСЕ. Пры гэтым польскія ўлады адмовілі ў магчымасці прыбыць на нараду міністру замежных спраў Расіі Сяргею Лаўрову.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда23
Каментары