Неўзабаве апублікуюць 30 унікальных фота Янкі Купалы, сярод якіх здымак з маці
30 забытых фотаздымкаў Янкі Купалы з даваеннага друку, у тым ліку здымак паэта, калі яму было ўсяго два гады, будуць апублікаваныя ў Беларусі. Часопіс «Роднае слова», анансуючы падпіску на наступнае паўгоддзе, паабяцаў апублікаваць унікальныя фота ў ліпеньскім нумары, піша «Камсамольская праўда».
Як вядома, дом Янкі Купалы згарэў разам з усім архівам і велізарнай бібліятэкай з дваццаці тысяч кніг ужо на трэці дзень вайны. Таму фотаздымкаў Купалы засталося мала. Затое некаторыя здымкі можна адшукаць у газетах і часопісах даваеннага часу. Што і зрабіў даследчык беларускай літаратуры Сяргей Шапран, адабраўшы 30 унікальных кадраў з жыцця песняра.
Даследаванне Шапрана «У пошуках беззваротна страчанага. Невядомыя фатаграфіі Янкі Купалы і ягоных бацькоў, пра якія забыліся на цэлае стагоддзе» якраз і збіраецца апублікаваць у ліпені часопіс «Роднае слова».
Пры гэтым адзін са здымкаў абяцае стаць сапраўднай сенсацыяй: на ім маленькі будучы паэт, якому ўсяго два гады, разам з сястрой і бацькамі.
Да гэтага часу лічылася, што фота бацькі паэта Дамініка Ануфрыевіча не захавалася — ягонае аблічча было вядомае толькі па малюнках пляменніка Купалы. Ды і фота самога паэта існавала да сённяшняга часу толькі адно — у шасцігадовым узросце.
Не было вядома і пра фотаздымкі Купалы з маці. А зараз будуць апублікаваныя не толькі здымкі паэта разам з Бянігнай Іванаўнай, але і невядомыя кадры з Якубам Коласам і Барысам Пастарнакам.
Таксама даследчык знайшоў унікальнае фота паэта за працоўным сталом — рэдкі здымак аўтарства І. Каплінскага, пра які не ўспаміналі больш за восемдзесят гадоў.
Цяпер чытаюць
Ціханоўская: Дзеці не пераехалі ў ЗША, а проста часова будуць з татам дзеля бяспекі27
Каментары