Месяцаход выявіў сляды лятучага элемента ў раней недаследаванай вобласці спадарожніка Зямлі.
Місія «Чандраян-3» — першы зямны аб’ект, які пакінуў свае сляды на паўднёвым полюсе Месяца. Шасціколавы даследчык зрабіў адкрыццё, важнае для стварэння будучага месца пражывання астранаўтаў на Месяцы.
Выкарыстоўваючы лазерны спектраскоп (LIBS) на борце месяцахода Pragyan, місія Chandrayaan-3 выявіла сляды серы на паверхні каля паўднёвага полюса, як паведаміла Індыйская арганізацыя касмічных даследаванняў (ISRO).
Месяцаход Pragyan, апроч лазернага спектраскопа, мае рэнтгенаўскі спектрометр альфа-часціц для вывучэння хімічнага саставу месяцовай паверхні, распавядае Gizmodo. Прыбор страляе лазернымі імпульсамі, якія выпарваюць рэгаліт (месяцовы грунт) у плазму, а потым апарат аналізуе святло, што выпраменьвае плазма. Кожны хімічны элемент у стане плазмы мае пэўную даўжыню светлавой хвалі, што і дазваляе распазнаць, якія элементы знаходзяцца на паверхні Месяца.
Месяцаход таксама выявіў алюміній, кальцый, хром, жалеза, марганец, кісларод, тытан і крэмній, паведамляе ISRO. Аднак даследчыкаў больш за ўсё ўзрушыла менавіта наяўнасць серы. Сера — гэта хімічны элемент, які ёсць у глебе, вадзе і раслінах на Зямлі. Яе прысутнасць на Месяцы сведчыць аб наяўнасці там вадзянога лёду. Адпаведна, наяўнасць серы і іншых элементаў на паўднёвым полюсе Месяца таксама сведчыць аб тым, што гэты рэгіён не такі ўжо негасцінны, як лічылася раней. Таксама ўпершыню быў вымераны профіль тэмпературы паўднёвага полюса, каб лепш зразумець цеплавыя паводзіны гэтай вобласці Месяца.
Поспех індыйскай місіі «Чандраян-3», якая паспяхова села на Месяц 23 жніўня, зрабіла Індыю чацвёртай краінай у гісторыі, што дасягнула такога выніку пасля ЗША, Кітая і СССР. Місія павінна доўжыцца 14 дзён, што эквівалентна аднаму поўнаму месяцоваму дню.
Паспяховая спроба Індыі высадзіцца на Месяц, безумоўна, зрабіла Індыю адным з удзельнікаў вялікай месяцовай гонкі, пра якую больш падрабязна можна пачытаць у артыкуле «Чаму ўсе спрабуюць прымесячыцца на паўднёвым полюсе Месяца?».
Чым сёння займаюцца некалі вядомыя героі ЖЖ? Спойлер: многія так і не закінулі блогерства1
Каментары