Баяліся, што індыйцы іх апярэдзяць. Эксперт абвінаваціў у крушэнні «Луна-25» чыноўнікаў і касмічную гонку
Адказнасць за няўдачу, якая напаткала расійскую касмічную місію «Луна-25», ляжыць, хутчэй за ўсё, на чыноўніках «Раскосмасу», а не на навукоўцаў, лічыць папулярызатар касманаўтыкі Віталь Ягораў. Як распавёў эксперт у гутарцы з The Insider, страта станцыі, якая разбілася напярэдадні пры спробе сесці на паверхню Месяца, «сімптаматычная» і адлюстроўвае агульны стан расійскай касманаўтыкі.
Ягораў мяркуе, што ў працы «Луна-25» нешта пайшло не па плане, але чыноўнікі «Раскосмасу» не захацелі мяняць графік палёту, паколькі баяліся саступіць індыйцам, якія адправілі да Месяца ўласную станцыю «Чандраян-3». Па словах эксперта, гэта нагадвае сітуацыі, калі савецкія апараты адпраўлялі ў космас «недаробленымі» ў спробе апярэдзіць супернікаў.
«Луна-25» магла б выканаць навуковую праграму, узбагаціць чалавецтва новымі ведамі аб навакольным свеце і адкрыць новыя магчымасці для расійскай навукі і міжнароднага супрацоўніцтва.
Але ўсе гэтыя перспектывы былі разбураныя расійскай дзяржавай, якая зрабіла стаўку не на засваенне космасу, а на засваенне тэрыторый суседніх суверэнных дзяржаў».
На думку Ягорава, няўдача, якая напаткала місію, ставіць пад пытанне будучыню праграм «Луна-26» і «Луна-27», якія цяпер могуць быць адкладзеныя ці ўвогуле спыненыя.
«Луна-25» — першая месяцовая місія ў сучаснай гісторыі Расіі. Згодна з планам, расійская станцыя, запушчаная 11 жніўня, павінна была стаць першым апаратам, які здзейсніў мяккую пасадку ля паўднёвага полюса Месяца, у раёне са складаным рэльефам. Усе папярэднія месяцовыя місіі садзіліся ў зоне экватара. Адной з асноўных задач місіі быў пошук вады на спадарожніку Зямлі.
16 жніўня РИА «Новости» паведамляла, што «Луна-25» абагнала індыйскую станцыю «Чандраян-3» і знаходзіцца на 50 км бліжэй да Месяца.
19 жніўня «Раскосмас» заявіў, што пры пераходзе «Луна-25» на перадпасадачную арбіту адбылася «няштатная сітуацыя».
На наступны дзень касмічнае агенцтва прызнала, што сувязь з апаратам страчана, і што ён, відаць, разбіўся, сутыкнуўшыся з паверхняй Месяца.
«Чандраян-3» быў запушчаны ў сярэдзіне ліпеня. Модуль з месяцаходам ужо аддзяліўся ад пералётнага модуля, пасадка на Месяц чакаецца 23 жніўня.
Цяпер чытаюць
«Калі вы пазакрываеце я**льнікі»: злоўлены на допінгу амапавец з Гродна паказаў сваё высокакультурнае аблічча13
Каментары