Дзяржаўны сакратар Рады бяспекі Беларусі Аляксандр Вальфовіч заявіў, што Беларусь адкрыта да дыялогу «па ўсіх пытаннях», але Польшча і краіны Балтыі, паводле яго, не адказваюць на заклікі Беларусі знайсці вырашэнне міграцыйнай праблемы, паведамляе БелТА.
«Усе нашы пасылы і звароты да нашых суседзяў — давайце канструктыўна размаўляць, у тым ліку і на міграцыйную тэму, каб знайсці выхады з гэтай сітуацыі, знайсці шляхі яе вырашэння, — застаюцца без адказу», — сказаў Аляксандр Вальфовіч у кулуарах сустрэчы сакратароў саўбезаў краін СНД, якая праходзіць 8 лістапада ў Маскве.
Паводле яго, хоць «улады Польшчы і краін Балтыі абвінавачваюць беларускі бок у стварэнні міграцыйнага крызісу», але за гэты год беларускімі пагранічнікамі зафіксавана каля 3 тысяч спроб выправаджэння груп мігрантаў з сумежнай тэрыторыі ў Беларусь.
За гэты год у Беларусі зафіксавалі 38 выпадкаў падкідвання трупаў мігрантаў з сумежнай тэрыторыі, сцвярджае Аляксандр Вальфовіч.
«Мы адкрыты да дыялогу па ўсіх пытаннях. Але нашы звароты і па лініі пагранведамстваў, і па лініі Міністэрства замежных спраў застаюцца без адказу: нашы суседзі (не народы, народы Польшчы і Прыбалтыкі з задавальненнем едуць у Беларусь), кіраўніцтва гэтых краін проста не хоча ісці па шляху вырашэння ўсіх пытанняў у канструктыўным рэчышчы», — заявіў дзяржсакратар Рады бяспекі.
Каментары