Помнік будзе непадалёк ад таго месца, дзе жанчына бегала на спатканні з будучым каралём.
У дворыку бібліятэкі Урублеўскіх Літоўскай акадэміі навук у Вільні да 2026 года з'явіцца помнік каралю Польшчы і вялікаму князю Літоўскаму Жыгімонту Аўгусту і яго жонцы Барбары Радзівіл, паведамляе Delfi.lt.
Бібліятэка і Літоўскі саюз мастакоў у снежні 2023 года абвясцілі конкурс на стварэнне помніка, прыём прапаноў будзе доўжыцца да 9 красавіка.
«Будынак бібліятэкі быў пабудаваны на месцы, дзе былі ўладанні Радзівілаў у 16-17 стст. Канкрэтна на месцы будынка былі сажалкі. Мы можам казаць, што з палаца, які знаходзіўся непадалёк, Барбара хадзіла на спатканні з Жыгімонтам», — сказаў кіраўнік бібліятэкі Сігітас Нарбутас.
Нарбутас спадзяецца, што скульптура ў дворыку з'явіцца ў 2024-2025 гадах.
Каментары
Трэба пісаць артыкулы на ангельскай мове, што напрыклад рабілі летувісы ўсё 20-е стагоддзе, дзе называлі ўсіх Гядімінасамі і Вільнюсамі, таму цяпер на захадзе гэта кансэнсус адносна гісторыі нашага рэгіёну.
Спачатку свой пункт гледжання моцна прасоўваеш, потым спасылаесся на яго як на аўтарытэт, калі ён прыняты -- вось так.