Музей-хату палешука ствараюць у заказніку рэспубліканскага значэння «Выганашчанскае» ў Івацэвіцкім раёне. Аўтэнтычны будынак для гэтага знайшлі ў адной з вёсак паблізу гарадскога пасёлка Целяханы. Хату акуратна перавезлі і ўсталявалі на востраве на экалагічнай сцежцы ў заказніку, паведаміла БелТА.
Хата, што будзе выкарыстоўвацца як памяшканне для музея, пабудаваная ў 1921 годзе.
«Хата старажытная, яшчэ сечаная сякерай, а не пілаваная. Цяпер напаўняем яе рэчамі, каб паказаць жыццё палешукоў стогадовай даўніны», — расказаў дырэктар заказніка Сяргей Габец.
Ён звярнуў увагу, што такое месца для размяшчэння музея выбралі таму, што раней жыхары Палесся сяліліся на выспах.
Спецыялісты спрабуюць прадэманстраваць побыт палешукоў: якімі рамёствамі і промысламі яны займаліся. У тым ліку будуць выкарыстоўвацца архіўныя фотаздымкі.
Рэалізацыю праекта пачалі сёлета, цяпер ідзе падбор экспанатаў. Плануецца, што ў 2024 годзе турысты змогуць пабачыць новы інфраструктурны аб’ект.
Увогуле плошча заказніка «Выганашчанскае» складае 55 тысяч гектараў. На яго тэрыторыі разнастайны ландшафт: размешчаныя рэкі, азёры, шмат верхавых, пераходных і нізінных балот. Таксама добраўпарадкаваная экалагічная сцежка з чатырма пешаходнымі маршрутамі. Атрымаць асалоду ад унікальнай прыроды можна, скарыстаўшыся воднымі маршрутамі. Сярод неабсяжных водных абшараў размешчана каля сотні некранутых выспаў.
Ёсць тут і цікавыя гістарычныя аб'екты. У прыватнасці, па тэрыторыі заказніка праходзіць Агінскі канал. Падчас Першай сусветнай вайны гэтую мясцовасць перасякала лінія фронту. А на беразе Бабровіцкага возера археолагі выявілі стаянку старажытных людзей (каменнага веку).
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары