10 самых папулярных беларускіх ютуб-каналаў. Пра некаторыя вы дакладна не чулі
Тэлеграм-канал «Youtube Беларусі» склаў топ беларускіх каналаў 2023 года па праглядах. У першай дзясятцы ёсць тыя, пра якія вы маглі не чуць — расказваем пра іх падрабязней.
Усе 50 самых папулярных каналаў, якія ўключылі ў топ, разам набралі ў 2023-м 2,5 мільярда праглядаў. Сярод лідараў ёсць каналы розных жанраў: гэта і медыя (напрыклад, NEXTA Live, БЕЛСАТ NEWS, Onliner), і забаўляльныя («Овощевоз», «Слава Комиссаренко», «Лонгплей»), каналы з дзіцячым і фітнэс-кантэнтам, музыка, відэа навуковага зместу і не толькі.
Аўтары спісу таксама называюць самыя хуткарослыя каналы рэйтынгу. Сярод іх, дарэчы, канал Наша Ніва NEWS — рост у 5,7 раза.
А топ-10 рэйтынгу выглядае так:
Расказваем пра каналы, якія могуць быць вам незнаёмымі.
ЗАРАЗ (900 мільёнаў праглядаў за год)
З вялікім адрывам у рэйтынгу лідзіруе канал «ЗАРАЗ» (1,69 мільёна падпісантаў) ад блогера Мікіты Кавалеўскага. Хлопец робіць пазнавальны кантэнт: відэа з фактамі пра розныя краіны, вядомых асобаў і феномены.
Некалькі месяцаў таму Мікіта паспрабаваў выжыванне ў Еўрасаюзе на 1 цэнт у суткі — насамрэч хлопец меў у сябе значна большыя сродкі, якія здабываў розным чынам падчас чэленджа. А ў канцы снежня ў Мікіты выйшла відэа пад назвай «Я з'ехаў у самы свабодны горад Расіі». Такім аказаўся горад Свабодны ў Амурскай вобласці, дзе Мікіта дакрануўся да класічнай расійскай глыбінкі — 30 градусаў марозу, савецкая архітэктура і непаўторны рэгіянальны сэрвіс.
perpetuumworld (270 мільёнаў праглядаў)
На другой пазіцыі ў спісе размясціўся канал з аглядамі гульняў — у perpetuumworld 3,64 мільёна падпісчыкаў. Выглядае, што ў Аляксандра, вядучага на perpetuumworld, няма пераваг у жанрах гульняў — ён бярэцца за ўсё: выжывае ў свеце зомбі з Arizona Sunshine 2, грае ў гастраэнтэролага ў Revenge Of The Colon і захоплівае старажытную Еўропу ў Shieldwall.
Відэа на канале выходзяць не радзей за тыдзень-два, а то і кожны дзень.
Дикий Лось (129,6 мільёна праглядаў)
Чацвёртае месца ў топе займае канал бабруйскага ратавальніка. Яўген Лось мае 20-гадовы стаж у трэніроўках (аддае перавагу варкауту і калістэніцы), два рэкорды, зарэгістраваныя ў Кнізе рэкордаў Гінэса, і багата чэмпіёнстваў краіны па вулічным варкауце.
Свой канал Яўген заснаваў яшчэ 13 гадоў таму. На гэтай старонцы ён выкладае відэа з трэніроўкамі для розных зон ці на ўсё цела, а раней яшчэ і рабіў чэленджы — напрыклад, з падцягваннямі ці працай на турніку. А нядаўна паказаў, як пажарныя адціскаюцца на брусах — 132 тысячы праглядаў!
Антон Маляр (75,8 мільёна праглядаў)
Пятае месца ў рэйтынгу займае канал пра машыны з 725 тысячамі падпісчыкаў. Збольшага блогер Антон расказвае пра тое, як ён фарбуе і пераварвае машыны, закранае і іншыя аўтамабільныя тэмы: напрыклад, як выдаліць іржу ўнізе дзвярэй, ці паказвае працэс аднаўлення старых машын.
Ролікі з рэстаўрацыяй аўтамабіляў — адны з самых папулярных на канале. Адзначым, напрыклад, аднаўленне ўседарожніка 1982 года, які нехта выкінуў (5,3 мільёна праглядаў) ці старога BMW з 1990-х (17 мільёнаў праглядаў).
NEWTONLABS (56,5 мільёна праглядаў)
На восьмай пазіцыі ў топе размясціўся канал пра гаджэты — праўда, аўтар аддае перавагу таварам ад Apple. Ёсць відэа і для няяблычнікаў — напрыклад, ролік «100 фактаў аб Apple» на 120 тысяч праглядаў ці відэа пра топ-20 найвялікшых тэхналагічных правалаў, якія ўвайшлі ў гісторыю (663 тысячы праглядаў).
Хаця і тым, хто ўжо мае гаджэты ад Apple, тут дакладна будзе на што паглядзець. Напрыклад, прэзентацыі розных мадэляў айфонаў, параўнанне кітайскіх і арыгінальных дапаўненняў для гаджэтаў, чахлоў і кабеляў.
Цалкам топ-50 ютуб-каналаў тут.
«Наша Нiва» — бастыён беларушчыны
ПАДТРЫМАЦЬЧытайце таксама:
Кіраўнік Apple распавёў, людзей з якімі якасцямі ён з радасцю возьме на працу
Apple выпускае навінку для багатых — акуляры змяшанай рэальнасці Vision Pro. Як яны працуюць?
Каментары