У дзяржаўны бюджэт Украіны паступілі 32 мільёны грыўняў (каля 780 тысяч еўра) канфіскаваных сродкаў падсанкцыйных асоб, паведаміў старшыня Фонду дзяржаўнай маёмасці Украіны Віталь Коваль.
«Сёння ўпершыню санкцыйныя грошы пачынаюць працаваць на дзяржаву. Больш за 32 млн грыўняў ужо паступіла ў дзяржаўны бюджэт. Гаворка ідзе пра ўласныя сродкі такіх калабарантаў, як Дзмітрый Варона і Уладзімір Сальда, і фінансы з прадпрыемства расейскага алігарха Дзерыпаскі», — распавёў кіраўнік Фонду дзяржмаёмасці.
Па яго словах, гэта стала магчымым дзякуючы сумеснай працы ўрада, Мінюста, Фонду дзяржаўнай маёмасці Украіны, праваахоўных органаў.
Еўрапейскі саюз, ЗША, Японія і Канада замарозілі актывы расейскага Цэнтрабанка на суму каля 300 мільярдаў долараў у 2022 годзе пасля ўварвання Расеі ва Украіну. Каля 200 мільярдаў з іх захоўваецца ў Еўропе, у асноўным у бельгійскім разліковым цэнтры Euroclear.
Раней Financial Times напісала, што краіны Захаду актыўна вывучаюць спосабы канфіскацыі замарожаных расейскіх актываў на карысць Украіны. У пачатку студзеня адміністрацыя прэзідэнта ЗША Джо Байдэна падтрымала законапраект, які дазваляе канфіскаваць частку замарожаных расейскіх актываў на карысць Украіны.
У той жа час у ЕС працягваюць абмяркоўваць пытанне выкарыстання даходаў ад замарожаных расейскіх актываў для падтрымкі Украіны. А менавіта сродкі, атрыманыя ў якасці прыбытку ад гэтых актываў пасля іх замарожвання (працэнты па ўкладах). Паводле ацэнак, цяпер гаворка ідзе пра 15 мільярдаў еўра. Еўракамісія прапанавала накіраваць гэтыя сродкі на спецыяльны рахунак, а з яго на падтрымку Украіны. Для гэтага рашэння патрэбна згода Еўрапарламента і ўсіх 27 краін ЕС.
Актывізацыя перамоваў выкліканая нявызначанасцю лёсу двух пакетаў фінансавай дапамогі Украіне на суму большую за 100 мільярдаў долараў: Кангрэс ЗША, як і раней, не прыняў рашэння аб фінансаванні Кіева на 2024 год, а прэмʼер-міністр Венгрыі Віктар Орбан заблакаваў выдзяленне на саміце Еўрасаюза эканамічнай дапамогі ЕС Украіне ў памеры 50 мільярдаў еўра.
У Маскве тым часам прыгразілі мерамі ў адказ у выпадку канфіскацыі замарожаных расейскіх актываў. Па некаторых даных, заходнія актывы ў Расеі складаюць 288 мільярдаў долараў.
«Кайлас, я іду». Што за беларуска знікла ў жудасным селі ў Непале6
Каментары