U biudžet Ukrainy pastupili pieršyja hrošy, kanfiskavanyja ŭ rasijan
U dziaržaŭny biudžet Ukrainy pastupili 32 miljony hryŭniaŭ (kala 780 tysiač jeŭra) kanfiskavanych srodkaŭ padsankcyjnych asob, paviedamiŭ staršynia Fondu dziaržaŭnaj majomaści Ukrainy Vital Koval.
«Siońnia ŭpieršyniu sankcyjnyja hrošy pačynajuć pracavać na dziaržavu. Bolš za 32 młn hryŭniaŭ užo pastupiła ŭ dziaržaŭny biudžet. Havorka idzie pra ŭłasnyja srodki takich kałabarantaŭ, jak Dźmitryj Varona i Uładzimir Salda, i finansy z pradpryjemstva rasiejskaha aliharcha Dzierypaski», — raspavioŭ kiraŭnik Fondu dziaržmajomaści.
Pa jaho słovach, heta stała mahčymym dziakujučy sumiesnaj pracy ŭrada, Miniusta, Fondu dziaržaŭnaj majomaści Ukrainy, pravaachoŭnych orhanaŭ.
Jeŭrapiejski sajuz, ZŠA, Japonija i Kanada zamarozili aktyvy rasiejskaha Centrabanka na sumu kala 300 miljardaŭ dołaraŭ u 2022 hodzie paśla ŭvarvańnia Rasiei va Ukrainu. Kala 200 miljardaŭ ź ich zachoŭvajecca ŭ Jeŭropie, u asnoŭnym u bielhijskim raźlikovym centry Euroclear.
Raniej Financial Times napisała, što krainy Zachadu aktyŭna vyvučajuć sposaby kanfiskacyi zamarožanych rasiejskich aktyvaŭ na karyść Ukrainy. U pačatku studzienia administracyja prezidenta ZŠA Džo Bajdena padtrymała zakonaprajekt, jaki dazvalaje kanfiskavać častku zamarožanych rasiejskich aktyvaŭ na karyść Ukrainy.
U toj ža čas u ES praciahvajuć abmiarkoŭvać pytańnie vykarystańnia dachodaŭ ad zamarožanych rasiejskich aktyvaŭ dla padtrymki Ukrainy. A mienavita srodki, atrymanyja ŭ jakaści prybytku ad hetych aktyvaŭ paśla ich zamarožvańnia (pracenty pa ŭkładach). Pavodle acenak, ciapier havorka idzie pra 15 miljardaŭ jeŭra. Jeŭrakamisija prapanavała nakiravać hetyja srodki na śpiecyjalny rachunak, a ź jaho na padtrymku Ukrainy. Dla hetaha rašeńnia patrebna zhoda Jeŭraparłamienta i ŭsich 27 krain ES.
Aktyvizacyja pieramovaŭ vyklikanaja niavyznačanaściu losu dvuch pakietaŭ finansavaj dapamohi Ukrainie na sumu bolšuju za 100 miljardaŭ dołaraŭ: Kanhres ZŠA, jak i raniej, nie pryniaŭ rašeńnia ab finansavańni Kijeva na 2024 hod, a premjer-ministr Vienhryi Viktar Orban zabłakavaŭ vydzialeńnie na samicie Jeŭrasajuza ekanamičnaj dapamohi ES Ukrainie ŭ pamiery 50 miljardaŭ jeŭra.
U Maskvie tym časam pryhrazili mierami ŭ adkaz u vypadku kanfiskacyi zamarožanych rasiejskich aktyvaŭ. Pa niekatorych danych, zachodnija aktyvy ŭ Rasiei składajuć 288 miljardaŭ dołaraŭ.
Ciapier čytajuć
Paśla źniknieńnia śpikierki Mielnikavaj niama dostupu da rachunkaŭ Kaardynacyjnaj rady40
Kamientary