У Юнацкім чэмпіянаце ЗША Станіслава Лапкеса прызналі найлепшым брамнікам.
Цалкам магчыма, неўзабаве ў Беларусі з'явіцца свой прадстаўнік і ў Галоўнай лізе сокера (MLS). У 2019 годзе ў Акадэмію «Каламбус Кру» паступіў галкіпер Станіслаў Лапкес (2006 г.н.), сын вядомага беларускага фехтавальшчыка, удзельніка Алімпійскіх гульняў Дзмітрыя Лапкеса, які ў канцы мінулага дзесяцігоддзя пераехаў у ЗША, піша football.by.
Лапкес-малодшы — выхаванец мінскага «Дынама», дзе быў капітанам у камандзе свайго ўзросту. Пасля пераезду ў Штаты яго бацька называў узровень падрыхтоўкі ў Мінску і Каламбусе «прорвай».
Аднак Стас хутка ўпісаўся. З юнацкай камандай «Каламбуса» (U-17) у 2022 ён дайшоў да фіналу MLS NEXT (па сутнасці, галоўны юнацкі чэмпіянат ЗША), быў названы найлепшым брамнікам Кубка MLS NEXT у гэтым узросце і нават удзельнічаў у матчы ўсіх зорак турніру.
З мая 2022 года ён падпісаў аматарскі кантракт з «Каламбусам-2», які выступае ў MLS Next Pro. Гэта трэцяя па іерархіі ліга ў ЗША. Калі праводзіць аналогіі, бліжэй за ўсё да яе наш чэмпіянат дублёраў.
У красавіку 2023-га ён дэбютаваў у спаборніцтве з «сухой» перамогі над другой камандай «Нью-Інгленд Рэвалюшн». У сезоне-2023 правёў 13 матчаў у рэгулярным чэмпіянаце, 5 з якіх абараніў на нуль, і 4 у плэй-оф (2 на нуль).
Яго каманда заняла трэцяе месца ў «рэгулярцы « Усходняй канферэнцыі MLS Next Pro, а затым дайшла да фіналу плэй-оф, дзе саступіла «Осціну» (1:3).
А ў кастрычніку Лапкес стаў адным з пяці футбалістаў клуба, якія падпісалі з «Каламбусам-2» прафесійныя кантракты.
Вось што казаў пра яго ў кастрычніку пасля падпісання генеральны дырэктар «Каламбус Кру II» Коры Рэй: «Стас — шматспадзеўны малады брамнік, які дамогся вялікіх поспехаў у нашай Акадэміі і ў другой камандзе. Мы рады падпісаць з ім яго першы прафесійны кантракт, чакаем яго далейшага развіцця».
А вось падборка сэйваў Лапкеса ад Instagram лігі.
Сезон-2024 Лапкес пачне, хутчэй за ўсё, таксама ў другой камандзе. Аднак па ходзе чэмпіянату пры такім прагрэсе нішто не перашкодзіць «Каламбусу» пры патрэбе падняць яго ў галоўную каманду.
Ці здасць Трамп Украіну Расіі? Чаму дэмакраты разгромленыя? Да чаго прывядзе кантроль рэспубліканцаў над выканаўчай і заканадаўчай уладай адначасова?8282
Каментары