Разам з ксяндзом Акалатовічам з Валожына затрымалі двух прыхаджанаў. Адзін з іх былы вайсковец
Ксёндз Генрых Акалатовіч, затрыманы 16 лістапада 2023 года, піша, што ні ў чым не вінаваты.
Прайшло паўгода з таго часу, як быў затрыманы, а затым узяты пад варту пробашч каталіцкай парафіі Святога Язэпа ў Валожыне ксёндз Генрых Акалатовіч. Супраць яго распачалі крымінальную справу і трымаюць у СІЗА КДБ у Мінску, нагадвае katolik.life.
З тых часоў пра святара, якому споўнілася ўжо 64 гады, практычна нічога не вядома: афіцыйныя органы так і не паведамілі ні абставіны справы, ні тое, у чым абвінавачваюць святара. Больш за тое, нават неафіцыйнай інфармацыяй не валодаюць ні духавенства, ні вернікі архідыяцэзіі.
Аднак Katolik.life пагутарыў з некалькімі людзьмі, каб даведацца хоць якія-небудзь звесткі пра святара. Следства яшчэ працягваецца. Артыкул, па якім абвінавачваюць святара, не называецца, але мяркуецца, што гэта «здрада дзяржаве».
Арыштаваны не толькі пробашч, але і двое вернікаў. Гэта гаспадыня, якая гатавала ежу для святара, а таксама пенсіянер — былы камандзір мясцовай вайсковай часткі, які ў апошнія гады працаваў у сельгаспрадпрыемстве, быў дэпутатам, дапамагаў прыходу. Воінская часць і касцёл знаходзяцца побач.
«На жанчыну, як мы чулі, ціснуць, каб яна дала паказанні. Бо доказаў віны ксяндза Генрыха няма. Гэта паважаны, заслужаны святар. Нездарма менавіта яго арыштавалі. Праз гэтую справу ціснуць на ўвесь Касцёл», — выказалі меркаванне вернікі.
Апошнія два месяцы лістоў ад ксяндза Генрыха Акалатовіча не было, а раней ён пісаў, што не прызнае абвінавачванне:
«Пасля цэнзуры даходзілі толькі абрыўкі лістоў. Ён пісаў, што ні ў чым не вінаваты, што гэта нейкае непаразуменне і заўсёды прасіў аб малітве, бо мае надзею толькі на Бога».
Нягледзячы на адсутнасць лістоў вядома, што ксёндз Генрых і цяпер трымаецца ў добрым духу, не скардзіцца:
«Ён не прывык скардзіцца. Але можна ўявіць, як яму цяжка па здароўі пераносіць зняволенне — у яго практычна выразаны страўнік, было некалькі аперацый».
Вернікам перадавалі, што пра справу ведаюць у Ватыкане і займаюцца ім, «хоць працэс ідзе павольна».
Цяпер чытаюць
«Калі мне было два гады, сваякі павезлі мяне ў Беларусь». Праз сацсеткі дзяўчына адшукала бацьку-расіяніна — але скончылася гісторыя сумна1
«Калі мне было два гады, сваякі павезлі мяне ў Беларусь». Праз сацсеткі дзяўчына адшукала бацьку-расіяніна — але скончылася гісторыя сумна
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам5454
«Беларусь яны бачаць часткай Расіі». Што значыць уздым «Альтэрнатывы для Германіі», наколькі далёка гэта можа зайсці і як сябе пазіцыянаваць беларусам54
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі4747
Каментары