Уладальнік «МЛ Віцебск» пра мэты клуба: Выйграць чэмпіянат, Кубак і Суперкубак, а таксама прайсці ў групавы этап аднаго з еўракубкаў
Уладальнік «МЛ Віцебск» Арцём Лявонаў расказаў пра задачы, якія стаяць перад камандай на сезон-2026, а таксама пракаментаваў чуткі пра заробак навічка каманды Валерыя Грамыкі, піша football.by.
«Мэты каманды наступныя: выйграць чэмпіянат, Кубак і Суперкубак, а таксама прайсці ў групавы этап аднаго з еўракубкаў», — сказаў Арцём Лявонаў.
Ён таксама пракаментаваў чуткі пра заробак найлепшага гульца краіны мінулага года Валерыя Грамыкі ў 1,5 мільёна рублёў, што падпісаў кантракт з «МЛ Віцебск», сышоўшы з казахстанскага «Кайрата».
«Відаць, яны лічаць, што калі на Transfermarkt кошт футбаліста складае 1,5 мільёна рублёў [сайт, дзе ацэньваецца патэнцыйны кошт футбалістаў — НН], то ён і павінен столькі зарабляць. А калі сур’ёзна, то, вядома, сума не адпавядае рэчаіснасці, бо ўмовы ў Грамыкі прыкладна такія ж, як і ў іншых нашых лідараў», — сказаў Лявонаў.
Раней ён расказваў пра заробкі ў клубе: «У нас каля 30% гульцоў атрымліваюць зарплату $300—500. На самой справе высокааплатных людзей не так шмат — гэта Захар Волкаў і Аляксандар Месаравіч. Ёсць некалькі гульцоў, якія атрымліваюць каля $10 000. У нас такіх трое». Вялося пра Волкава і серба Месаравіча, прозвішча трэцяга гульца Лявонаў не назваў.
«МЛ Віцебск» (з 2021 года клуб называўся «Макслайн», бо спонсар — букмекерская кампанія) у сезоне-2024 заняў другое месца ў чэмпіянаце першай лігі, выйшаў у вышэйшую і адразу выйграў яе і ўлетку будзе стартаваць у першым раўндзе кваліфікацыі Лігі чэмпіёнаў.
У мінулым годзе ў кваліфікацыі Лігі чэмпіёнаў чэмпіён краіны мінскае «Дынама» выбыла ўжо ў першым раўндзе, прайграўшы балгарскаму «Лудагорцу», а ў другім кваліфікацыйным раўндзе Лігі канферэнцый без шанцаў прайграла албанскай «Эгнаціі». Гродзенскі «Нёман» дабраўся да плэй-оф кваліфікацыі Лігі канферэнцый, дзе прайграў іспанскаму «Рая Валекана».
У сезоне 2024‑2025 мінскае «Дынама» гуляла ў асноўным раўндзе Лігі канферэнцый.
Перад гэтым з 2019 года беларускія клубы не дабіраліся да групавога раўнду еўракубкаў.
Чэмпіянат Беларусі пачнецца ў сакавіку, у 1/4 фіналу Кубку Беларусі «МЛ Віцебск» 8 і 15 сакавіка згуляе з брэсцкім «Дынама».
Былы міністр культуры Руслан Чарнецкі знайшоў сабе падпрацоўку9
Каментары