Для сабачак і коцікаў. Ці засяліліся ў новую рэзідэнцыю Лукашэнкі дабрачынныя фонды?
Год таму стала вядома, што ў Мінску будуюць новую багата абстаўленую рэзідэнцыю. Лукашэнка адхрышчваўся ад яе і прапаноўваў аддаць яе арганізацыям, якія сам жа і зачыніў. Што адбылося за год з новай рэзідэнцыяй?
Летась у сваім расследаванні «Белпол» расказаў пра будынак былой лечкамісіі па вуліцы Чырвонаармейскай, які быў рэканструяваны ў раскошную рэзідэнцыю. Супрацоўнікі «Белпола» атрымалі сотні дакументаў, якія тычыліся будоўлі, у тым ліку дэталёвыя планы, дызайн-канцэпцыі, кантракты, дамовы аб пастаўках, каштарысы на закупы. Крыніцай фінансавання рэканструкцыі быў дзяржаўны бюджэт.
На першым паверсе была задумана VIP-зона адпачынку са спа, саўнай, прыборамі «штучнае сонца», душам уражанняў і нават снегагенератарам. Другі паверх адведзены пад працоўныя памяшканні. На трэцім паверсе прадстаўнічыя памяшканні з дарагімі вітражамі, а таксама кабінет загадкавага кіраўніка з апартаментамі. Нарэшце на чацвёртым паверсе размяшчаліся кабінеты для персаналу, у тым ліку ахоўніка і асабістага доктара. Найбольш звяртаў на сябе ўвагу кабінет, які быў абсталяваны па прыкладзе кабінета Лукашэнкі ў цяперашняй ягонай рэзідэнцыі ў Палацы Незалежнасці.
Уражвалі і меры бяспекі. Пры рэканструкцыі была знішчана ўся гістарычныя агароджа ўздоўж вуліц Янкі Купалы, Першамайскай і Чырвонаармейскай. На яе месцы з’явілася новая — удвая вышэйшая. Толькі з боку вуліцы Янкі Купалы сёння можна налічыць не менш за 7 камер відэаназірання. А яшчэ два пасты аховы і кантрольна-прапускны пункт з боку Чырвонаармейскай вуліцы. Такія меры бяспекі патрэбныя для аховы толькі аднаго цела ў Беларусі.
Па інфармацыі «Нашай Нівы», будынак былога аддзялення афтальмалогіі Рэспубліканскага клінічнага медыцынскага цэнтра (гэта значыць, прэзідэнцкай бальніцы) — гэта ў задуме рэзідэнцыя старшыні Усебеларускага народнага сходу. Такую новую пасаду Аляксандр Лукашэнка прапісаў у Канстытуцыі ў 2022 годзе. Уладальнік гэтай пасады мае паўнамоцтвы кантраляваць прэзідэнта краіны, што дало падставы меркаваць, што яна задуманая пад самога Лукашэнку на перыяд, калі ён пастарэе і захоча перадаць уладу падкантрольнаму сабе пераемніку.
Аднак тады Лукашэнка пачаў апраўдвацца, што ў краіне, маўляў, пачынаецца электаральная кампанія (выбары ў парламент), таму варожыя сілы актывізаваліся і спрабуюць укусіць у тым ліку і яго, хоць ён, маўляў, у дэпутаты і не ідзе.
Паводле версіі Лукашэнкі, стары будынак, як ён сцвярджае, «рэабілітацыйнага» аддзялення бальніцы ягонае Упраўленне справамі адрамантавала, і ён даручыў «на другіх паверхах усе фонды, якія мы закрылі, сабачак лячылі, катоў, дабрачынныя і гэтак далей сабраць пад адзін дах». Рэзідэнцый, маўляў, у яго і без таго хапае, і яму без розніцы, дзе працаваць.
Самі па сабе словы Лукашэнкі, што ў будынак заселяць фонды, якіх больш не існуе дзякуючы ягонай палітыцы, аксюмаран. Ніякія закрытыя ім фонды не былі адноўленыя, гэта проста немагчыма ў сённяшняй Беларусі, а на іх месца не прыйшлі іншыя.
У адказ на расследаванне прапагандысты сталі прасоўваць інфармацыю пра тое, што ў будынку на вуліцы Чырвонаармейскай, 15 размясціўся лукашэнкаўскі «Фонд Першага», зарэгістраваны быццам бы яшчэ 25 кастрычніка 2022. Пра ягоныя мэты распавёў і сам Лукашэнка, патлумачыўшы, што фонд яшчэ не дзейнічае і грошай пакуль не мае.
Але пасля гэтай інфармацыйнай контратакі, якая адбылася ў пачатку кастрычніка 2023 года, фонд з такой назвай больш ні разу не згадваўся ў публічнай прасторы. Дабрачынная арганізацыя не мае ні сайта, ні старонак у сацсетках, ні кантактаў, па якіх з ёй можна звязацца для атрымання абяцанай дапамогі.
У маі 2024 года быў зацверджаны новы зямельны ўчастак, які пашырыў межы рэзідэнцыі: ён ахапіў не толькі тэрыторыю былой лечкамісіі, але і так званы дом Офлі па вуліцы Янкі Купалы, 5. Паводле інфармацыі «Белпола», у гэтым будынку размяшчалася аператыўна-тэхнічная служба Аператыўна-аналітычнага цэнтра пры прэзідэнце.
Звычайна для зручнасці гаспадарання розныя дзяржаўныя ўстановы, размешчаныя ў асобных будынках, маюць і асобныя зямельныя ўчасткі. Выключэнне складаюць выпадкі, калі некалькі ўстаноў займаюць адзін будынак. Хутчэй за ўсё, сёння абодва будынкі ў межах зямельнага ўчастка займае адна і тая ж установа.
З моманту завяршэння рэканструкцыі ўжо мінуў год. Сёння ніводная арганізацыя, калі не лічыць пустышкі пад назвай «Фонд Першага», не зарэгістравана па адрасе вул. Чырвонаармейская, 15.
Таксама ў якасці свайго гэты адрас афіцыйна не пазначала аніякая дзяржаўная ўстанова. З Усебеларускім народным сходам, які пазіцыянуецца як найвышэйшы прадстаўнічы орган народаўладдзя, гэтаму самаму народу ніяк не звязацца — у яго няма ні адраса, ні электроннай пошты. У сістэме «обращения.бел» ён не зарэгістраваны, а сайт vsebel.by, запушчаны ў канцы 2020 года, перастаў адкрывацца ў першай палове 2021 года.
Калі УНС існуе не толькі на паперы, то прынамсі намеснік старшыні сходу, пасаду якога займае Аляксандр Косінец, і ягоны сакратарыят мусяць дзесьці ўвесь час працаваць паміж пасяджэннямі, не выключана, што якраз у новай рэзідэнцыі.
24 красавіка 2024 года Лукашэнка быў выбраны старшынёй Усебеларускага народнага сходу. Але паколькі гэтую пасаду ён сумяшчае з пасадай прэзідэнта, неабходнасці ў асобнай рэзідэнцыі для старшыні УНС пакуль няма. Зусім не выпадкова, што ў рэканструяваны будынак у цэнтры сталіцы дагэтуль не заехалі не толькі «коцікі і сабачкі», але і якая-небудзь дзяржаўная ўстанова. Пусты будынак чакае, калі ў яго заедзе сапраўдны гаспадар.
Ужо ў наступным 2025 годзе, найбольш верагодна, што 23 лютага, у Беларусі адбудуцца чарговыя прэзідэнцкія выбары.
З улікам пустуючай рэзідэнцыі і нядаўняга ўвядзення ў Крымінальны кодэкс новага артыкула, які прадугледжвае да 8 гадоў зняволення за пагрозы былому прэзідэнту і членам яго сям'і, тэарэтычна можна высоўваць прагноз, што Лукашэнка мог бы не ісці на выбары, пакінуць пасаду прэзідэнта і застацца толькі старшынёй УНС. Аднак ніякіх сур'ёзных сведчанняў на карысць гэтай версіі няма.
Зрэшты, Лукашэнка нічога не губляе і ад варыянту, калі ягоная новая рэзідэнцыя яшчэ некалькі гадоў прастаіць закансерваванай, пакуль ён яшчэ будзе сядзець на двух крэслах.
Аляксандр Лукашэнка. Фота: Mikhail Metzel Sputnik Kremlin Pool Photo via AP
У цэнтры Мінска пабудаваная рэзідэнцыя старшыні Усебеларускага народнага сходу? Там ён зможа не толькі працаваць і жыць, але і лячыцца
«Усе фонды, якія мы закрылі, сабраць пад адзін дах». Лукашэнка апраўдваўся адносна новай рэзідэнцыі
У меркаванай рэзідэнцыі Лукашэнкі ў цэнтры Мінска зарэгістраваны «Фонд Першага»
«Грузіць сябе і іншых»: былы памочнік Лукашэнкі Ігар Брыло бярэ на сябе віну ў прамысловых аб'ёмах8
Каментары