Расійскі мультымільянер Неўзлін мог быць арганізатарам нападу ў Вільні на Леаніда Волкава, паплечніка Навальнага
Выказваліся меркаванні, што былы бізнэс-партнёр Хадаркоўскага Леанід Неўзлін фінансуе некаторыя беларускія медыя і палітычныя ініцыятывы, якія выступаюць з рэзкай крытыкай Святланы Ціханоўскай. Цяпер жа ён апынуўся ў цэнтры вялікага ўнутрырасійскага скандалу. Неўзліна падазраюць у арганізацыі нападаў на расійскіх апазіцыянераў.
Фонд барацьбы з карупцыяй (ФБК) у сваім новым расследаванні сцвярджае, што расійскі мультымільянер, адзін з былых кіраўнікоў ЮКОСа Леанід Неўзлін быў замоўцам замаху на паплечніка Навальнага Леаніда Волкава, які адбыўся ў сакавіку 2024 года. Тады невядомыя збілі Волкава каля яго дома ў Вільні.
Дакументы ўяўляюць сабою перапіску чалавека, які называе сябе Леанідам Неўзліным, з юрыстам, чые даныя супадаюць з юрыстам Анатолем Бліновым, які цяпер пражывае ў Польшчы.
У матэрыяле прыводзіцца шэраг аргументаў на карысць таго, што перапіска з'яўляецца сапраўднай. Акрамя гэтага, некаторыя падрабязнасці гісторыі расказаў Андрэй Матус. Яго называюць «рашалам» — чалавекам, які дапамагае ўрэгуляваць праблемы з праваахоўнымі органамі.
З матэрыялаў перапіскі вынікае, што менавіта Бліноў арганізаваў напад на Волкава па замове Неўзліна.
Першапачатковы план заключаўся ў тым, каб выкрасці Волкава ў Літве і вывезці ў Расію, узгадніўшы гэта з ФСБ.
Падрыхтоўка пачалася ў кастрычніку 2023 года. У пачатку лістапада Бліноў папрасіў у Неўзліна 12 тысяч еўра на арэнду «двух караблікаў», каб вывезці Волкава з Рыгі і даставіць у Санкт-Пецярбург.
Аднак гэты план не спрацаваў. Матэрыялы перапіскі не дазваляюць даць адказ, чаму нічога не атрымалася.
Пасля няўдачы было вырашана паспрабаваць рэалізаваць план у Нью-Ёрку, куды выляцеў Волкаў. Услед за мужчынам накіраваўся нейкі грамадзянін Польшчы, якога наняў Бліноў. Яму была пастаўлена задача як мінімум скрасці дакументы Волкава, максімум — збіць так, каб мужчына трапіў у інвалідную каляску. Аднак зручнага моманту не знайшлі.
Толькі ў сакавіку 2024 года план атрымалася рэалізаваць. Аднак, як расказвае Матус, Неўзлін быў незадаволены. Па меркаванні мультымільянера, Волкаў быў збіты недастаткова моцна.
«Вы яго так ад****лі, што я сам магу. Мне трэба было, каб ён вераб'ям да канца жыцця дулі круціў, а вы там яму два сінякі паставілі…», — пераказвае Матус словы Неўзліна.
У выніку выканаўцы не атрымалі абяцаныя $250 тысяч.
Матусу была пастаўлена задача пазбавіцца ад доказаў датычнасці Неўзліна да нападу. Для гэтага ён павінен быў забраць у Блінова і яго памагатых мабільныя тэлефоны. Мужчына гэта зрабіў, але не аддаў іх Неўзліну, а звязаўся з Фондам барацьбы з карупцыяй. Чаму ён гэта зрабіў, невядома.
У Расіі Неўзлін прысуджаны да пажыццёвага зняволення за арганізацыю забойстваў, аднак многія лічаць гэтыя абвінавачванні палітычна матываванымі. Неўзлін лічыць, што Крэмль помсціць яму за спансаванне апазіцыйных партый. Мультымільянер жыве ў Ізраілі, які адмовіўся выдаваць яго Расіі.
У беларускіх каляпалітычных колах выказваліся меркаванні, што Неўзлін фінансуе некаторыя беларускія медыя і палітычныя ініцыятывы, якія выступаюць з крытыкай Святланы Ціханоўскай.
«Гэта такі тыповы бандыцкі прывет ад Пуціна». У Леаніда Волкава дыягнаставалі пералом рукі пасля таго, як на яго напалі ў Вільні
У Польшчы затрымалі двух чалавек, якіх падазраюць у збіцці расійскага апазіцыянера Волкава ў Вільні
Нанятыя беларусам для нападу на Леаніда Волкава палякі пракалоліся на дробязі. Вось як яны сябе выдалі
Коля Лукашэнка сыграў на раялі на «Дні народнага адзінства». Яго тата перад гэтым прыгразіў Трэцяй сусветнай вайной27
Каментары