Rasijski multymiljanier Nieŭźlin moh być arhanizataram napadu ŭ Vilni na Leanida Vołkava, paplečnika Navalnaha
Vykazvalisia mierkavańni, što były biznes-partnior Chadarkoŭskaha Leanid Nieŭźlin finansuje niekatoryja biełaruskija miedyja i palityčnyja inicyjatyvy, jakija vystupajuć z rezkaj krytykaj Śviatłany Cichanoŭskaj. Ciapier ža jon apynuŭsia ŭ centry vialikaha ŭnutryrasijskaha skandału. Nieŭźlina padazrajuć u arhanizacyi napadaŭ na rasijskich apazicyjanieraŭ.
Fond baraćby z karupcyjaj (FBK) u svaim novym rasśledavańni śćviardžaje, što rasijski multymiljanier, adzin z byłych kiraŭnikoŭ JUKOSa Leanid Nieŭźlin byŭ zamoŭcam zamachu na paplečnika Navalnaha Leanida Vołkava, jaki adbyŭsia ŭ sakaviku 2024 hoda. Tady nieviadomyja źbili Vołkava kala jaho doma ŭ Vilni.
Dakumienty ŭjaŭlajuć saboju pierapisku čałavieka, jaki nazyvaje siabie Leanidam Nieŭźlinym, ź jurystam, čyje danyja supadajuć ź jurystam Anatolem Blinovym, jaki ciapier pražyvaje ŭ Polščy.
U materyjale pryvodzicca šerah arhumientaŭ na karyść taho, što pierapiska źjaŭlajecca sapraŭdnaj. Akramia hetaha, niekatoryja padrabiaznaści historyi raskazaŭ Andrej Matus. Jaho nazyvajuć «rašałam» — čałaviekam, jaki dapamahaje ŭrehulavać prablemy z pravaachoŭnymi orhanami.
Z materyjałaŭ pierapiski vynikaje, što mienavita Blinoŭ arhanizavaŭ napad na Vołkava pa zamovie Nieŭźlina.
Pieršapačatkovy płan zaklučaŭsia ŭ tym, kab vykraści Vołkava ŭ Litvie i vyvieźci ŭ Rasiju, uzhadniŭšy heta z FSB.
Padrychtoŭka pačałasia ŭ kastryčniku 2023 hoda. U pačatku listapada Blinoŭ paprasiŭ u Nieŭźlina 12 tysiač jeŭra na arendu «dvuch karablikaŭ», kab vyvieźci Vołkava z Ryhi i dastavić u Sankt-Pieciarburh.
Adnak hety płan nie spracavaŭ. Materyjały pierapiski nie dazvalajuć dać adkaz, čamu ničoha nie atrymałasia.
Paśla niaŭdačy było vyrašana pasprabavać realizavać płan u Ńju-Jorku, kudy vylacieŭ Vołkaŭ. Uśled za mužčynam nakiravaŭsia niejki hramadzianin Polščy, jakoha naniaŭ Blinoŭ. Jamu była pastaŭlena zadača jak minimum skraści dakumienty Vołkava, maksimum — źbić tak, kab mužčyna trapiŭ u invalidnuju kalasku. Adnak zručnaha momantu nie znajšli.
Tolki ŭ sakaviku 2024 hoda płan atrymałasia realizavać. Adnak, jak raskazvaje Matus, Nieŭźlin byŭ niezadavoleny. Pa mierkavańni multymiljaniera, Vołkaŭ byŭ źbity niedastatkova mocna.
«Vy jaho tak ad****li, što ja sam mahu. Mnie treba było, kab jon vierabjam da kanca žyćcia duli kruciŭ, a vy tam jamu dva siniaki pastavili…», — pierakazvaje Matus słovy Nieŭźlina.
U vyniku vykanaŭcy nie atrymali abiacanyja $250 tysiač.
Matusu była pastaŭlena zadača pazbavicca ad dokazaŭ datyčnaści Nieŭźlina da napadu. Dla hetaha jon pavinien byŭ zabrać u Blinova i jaho pamahatych mabilnyja telefony. Mužčyna heta zrabiŭ, ale nie addaŭ ich Nieŭźlinu, a źviazaŭsia z Fondam baraćby z karupcyjaj. Čamu jon heta zrabiŭ, nieviadoma.
U Rasii Nieŭźlin prysudžany da pažyćciovaha źniavoleńnia za arhanizacyju zabojstvaŭ, adnak mnohija ličać hetyja abvinavačvańni palityčna matyvavanymi. Nieŭźlin ličyć, što Kreml pomścić jamu za spansavańnie apazicyjnych partyj. Multymiljanier žyvie ŭ Izraili, jaki admoviŭsia vydavać jaho Rasii.
U biełaruskich kalapalityčnych kołach vykazvalisia mierkavańni, što Nieŭźlin finansuje niekatoryja biełaruskija miedyja i palityčnyja inicyjatyvy, jakija vystupajuć z krytykaj Śviatłany Cichanoŭskaj.
«Heta taki typovy bandycki pryviet ad Pucina». U Leanida Vołkava dyjahnastavali pierałom ruki paśla taho, jak na jaho napali ŭ Vilni
U Polščy zatrymali dvuch čałaviek, jakich padazrajuć u źbićci rasijskaha apazicyjaniera Vołkava ŭ Vilni
Naniatyja biełarusam dla napadu na Leanida Vołkava palaki prakałolisia na drobiazi. Voś jak jany siabie vydali
Ciapier čytajuć
U Minsku zaviaršyli budaŭnictva piacizorkavaha hatela na miescy kolišniaha «Biełekspa»7
U Minsku zaviaršyli budaŭnictva piacizorkavaha hatela na miescy kolišniaha «Biełekspa»
Sumleńnie, kachańnie, koły piekła i halivudski finał. U siamji budaŭnika i biblijatekarki z Pružanskaha rajona Ihara i Julii Łaptanovičaŭ aryštavali spačatku jaho, paśla — jaje, a paśla i babulu33
Kamientary