«Гэтая краіна праходзіць праз пекла». Трамп сустрэўся з Зяленскім і пахваліўся добрымі адносінамі з Пуціным
А яшчэ кандыдат у прэзідэнты ЗША сказаў, што хутка вырашыць пытанне з вайной, калі стане пераможцам на выбарах.
Прэзідэнт Украіны Уладзімір Зяленскі сустрэўся з кандыдатам у прэзідэнты ЗША Дональдам Трампам. Сустрэча палітыкаў адбылася ў Trump Tower у Нью-Ёрку. Трамп заявіў, што для яго гонар сустрэцца з украінскім лідарам, піша The Guardian.
«Для нас вялікі гонар бачыць прэзідэнта сярод нас, ён шмат перажыў. Ён перажывае каласальныя цяжкасці», — сказаў Трамп, дадаўшы: «Мы правядзём абмеркаванне і паглядзім, да чаго можна прыйсці».
Экс-прэзідэнт ЗША назваў пеклам сітуацыю ў Украіне. «Гэтая краіна праходзіць праз пекла… Я ніколі не бачыў нічога падобнага на гэтую жахлівую сітуацыю», — адзначыў ён, гаворачы пра Украіну.
Трамп таксама адзначыў, што ў яго добрыя адносіны з Зяленскім, і пахваліўся вельмі добрымі адносінамі з Уладзімірам Пуціным. «Я думаю, калі мы пераможам, мы вельмі хутка вырашым гэтае пытанне», — сказаў Трамп, маючы на ўвазе вайну Расіі супраць Украіны. Зяленскі ў адказ выказаў надзею, што ў іх з Трампам адносіны будуць лепшыя, чым у Трампа з Пуціным.
«Я думаю, у нас ёсць агульны погляд на тое, што вайна ва Украіне павінна быць спыненая, і Пуцін не можа перамагчы. Украіна павінна перамагчы. І я хачу абмеркаваць з вамі дэталі плана перамогі», — адзначыў прэзідэнт Украіны, звяртаючыся да Трампа.
Напярэдадні Зяленскі сустрэўся з канкурэнткай Трампа Камалай Харыс і прэзідэнтам ЗША Джо Байдэнам.
Трамп раней на перадвыбарчым мітынгу заявіў, што «Украіны больш няма». Па ягоным меркаванні, на аднаўленне ўкраінскіх гарадоў пасля вайны не хопіць грошай. У той жа час ён яшчэ раз раскрытыкаваў адміністрацыю Байдэна за падтрымку Кіева ў вайне.
Каментары