Скандал у каралеўскай сям'і Нарвегіі: сына прынцэсы абвінавачваюць у сэксуальным гвалце

Цяперашні кароль Нарвегіі — 87-гадовы Харальд V. Услед за ім узначаліць краіну павінен яго 51-гадовы сын, кронпрынц Хокан. А вось у жонкі Хокана, наследнай прынцэсы Нарвегіі Метэ-Марыт, ёсць сын ад першага шлюбу. Пра яго, 27-гадовага Марыуса Борга Хёйбі, і ідзе гаворка. Ён не можа ўзначаліць краіну, але тым не менш датычны да каралеўскай сям'і. Скандал, у які ён уляпаўся, абмяркоўвае ўся Нарвегія. Зрэшты, уся біяграфія Марыуса Борга — знаходка для скандынаўскіх таблоідаў.

Маці нарадзіла яго ў студзені 1997 года, калі працавала афіцыянткай у Осла. На момант з'яўлення хлопчыка на свет яго біялагічны бацька адбываў турэмны тэрмін за злачынствы, звязаныя з наркотыкамі і гвалтам.

Пасля нараджэння сына Метэ-Марыт вярнулася ў свой родны горад, дзе выхоўвала хлопчыка з іншым партнёрам, пакуль у 1999 годзе не пазнаёмілася з наследным прынцам Хоканам і праз некалькі гадоў не выйшла за яго замуж.

Павялічыць

У адрозненне ад сваёй маці, якая мае статус наследнай прынцэсы, Марыус не мае ніякіх афіцыйных тытулаў, пра яго няма інфармацыі на афіцыйным сайце нарвежскай каралеўскай сям'і, якая заўжды падкрэслівала, што пасынак кронпрынца не будзе выконваць ніякіх публічных абавязкаў. Праўда, час ад часу хлопчык прымаў удзел у сямейных мерапрыемствах.

Павялічыць

Пасля заканчэння сярэдняй школы Марыус пачаў вывучаць эканоміку ў Лос-Анжэлесе, але ўжо праз некалькі месяцаў кінуў вучобу і вярнуўся ў Нарвегію, дзе заслужыў рэпутацыю спешчанага і свавольнага чалавека.

Адна з уплывовых газет Нарвегіі Dagbladet апісвае кола зносін Хёйбі як «багатых спадчыннікаў, знакамітасцяў і інфлюенсераў», а таксама людзей, якія былі асуджаныя за гандаль наркотыкамі і сур'ёзныя злачынствы.

Хёйбі не аднойчы трапляў у розныя скандалы. Так, у 15-гадовым узросце ён выклаў у сваіх сацыяльных сетках здымкі, якія дазвалялі вызначыць месцазнаходжанне каралеўскай сям'і. У 2017 годзе Хёйбі быў асуджаны за захоўванне наркотыкаў. Пры затрыманні хлопец сцвярджаў, што пражывае ў каралеўскім палацы, што не з'яўлялася праўдай.

У жніўні гэтага года малады чалавек быў затрыманы па абвінавачанні ў нанясенні цялесных пашкоджанняў і прычыненні матэрыяльнай шкоды. Пацярпелай была яго дзяўчына, якую даставілі ў бальніцу з страсеннем мозгу. Паліцыя, якая прыехала па выкліку, убачыла разгромленую кватэру, у адным з пакояў якой з сцяны тырчаў нож.

Тады хлопец правёў пад арыштам 30 гадзін, а пазней выступіў з публічнаю заявай, у якой прызнаўся ў гвалце над дзяўчынай у стане алкагольнага і наркатычнага ап'янення.

Павялічыць

18 лістапада 2024 года Марыуса зноў затрымалі. У яго доме правялі ператрус. Як паведамляе паліцыя, разам з Хёйбі ў машыне знаходзілася тая самая дзяўчына, якую ён пабіў у жніўні. Прычым суд забараніў яму з ёй бачыцца на працягу паўгода. У верасні мужчыну ўжо арыштоўвалі за парушэнне гэтай судовай забароны. Тады ён спрабаваў звязацца з ёй па тэлефоне.

Паведамляецца, што на гэты раз паліцыя расследуе выпадкі гвалту ў адносінах дзвюх былых дзяўчын Марыуса і сэксуальнага гвалту ў адносінах дзвюх іншых жанчын, а таксама пагрозы забойства, дзе пацярпелым выступае мужчына.

Наконт выпадкаў сэксуальнага гвалту паліцыя мае відэадоказы, якія знайшлі ў тэлефоне маладога чалавека. Вядома, што адзін з выпадкаў адбыўся ў сакавіку гэтага года ў Осла. Ахвярай стала 20-гадовая дзяўчына, якая не ведала Хёйбі да таго, як сустрэла яго ў дзень, калі ён здзейсніў гвалт у адносінах яе.

Другі выпадак адбыўся ў верасні ў доме Марыуса. Пра ахвяру нічога не паведамляецца.

У абодвух выпадках гаворка ідзе аб «сэксуальных дзеяннях у адносінах жанчыны, якая была не ў стане аказаць супраціў».

Заканадаўства Нарвегіі за такія дзеянні прадугледжвае турэмнае зняволення на тэрмін да 10 гадоў. Судовыя пасяджэнні па гэтых дзвюх справах закрытыя для прэсы.

• 2
• 0
• 1
• 14
• 6
• 1
• 3
• 0