«Выспа праклятых» — псіхіятрычны дэтэктыўны трымценнік з Леанарда Ды Капрыо, Максам фон Сюдавым і Бенам Кінгслі.
Выспа праклятых (Shutter Island)
ЗША, 2009, каляровы, 138 хв.
Рэжысёр: Марцін Скарсэзэ
Ролі выконваюць: Леанарда Ды Капрыо, Марк Руфала, Бен Кінгслі, Мішэль Уільямс, Макс фон Сюдаў, Эмілі Морцімер
Жанр: Псыхіятрычны дэтэктыўны трымценнік паводле раману Дэніса Легайна
Адзнака: 5 (з 10)
1954 год. Тэдзі Дэніэлс расследуе ўцёкі забойцы-вар’яткі, якая загадкава знікла з псіхіятрычнай лякарні. Лякарня стаіць на адасобленай выспе, пабудаваная як крэпасць, і схавацца няма куды. Але ў героя ёсць яшчэ таемныя мэты, роўна, як свае мэты ёсць і ў лекараў…
Шэра-свінцовае неба, грувасткая замкнёная прастора, мур з чырвонае цэглы, навязлівыя галюцынацыі, аздобленыя дызайнам Дантэ Фэрэці. Пакутлівыя комплексы, форма ахоўнікаў, што рыфмуецца з эсэсаўскаю, сны пра Дахау. Попел і снег.
Уцёклыя нацысты (падступна-падкалодны дуэт Бена Кінгслі і Макса фон Сюдава), забароненыя эксперыменты, антыкамунізм. Аслупянеласць і ліхаманка Леанарда Ды Капрыо, шаленства.
Усе складнікі густоўнай жанравай параноі, калі б не адно але.
Рэжысёр Марцін Скарсэзэ.
У яго занадта прэтэнзій — і чамусьці яны няўпэўненыя. Гучыць улюбёная рэжысёрская тэма пра гвалт, супраціў, межы чалавечнасці. Але для аўтарскага кіно бракуе імпэту, а для жанравай стужкі — рамесніцкай сціпласці.
У любым выпадку асобным пацыентам гарантаваны «вынас мозгу».
На сайце imdb.com карціна ўваходзіць у спіс 250 найлепшых стужак.
Цяпер чытаюць
Апакаліпсіс заўтра. Статкевіч напісаў першы артыкул — з папярэджаннем пра небяспеку з боку Расіі50
Апакаліпсіс заўтра. Статкевіч напісаў першы артыкул — з папярэджаннем пра небяспеку з боку Расіі
У якой разведкі была найлепшая інфармацыя з Беларусі ў лютым 2022 і хто паведаміў Буданаву, што асноўны ўдар расіян будзе на Гастомель. З’явілася вялікая публікацыя2020
Каментары