Прадстаўнік МЗС Расіі Марыя Захарава падтрымала патрабаванне беларускага намесніка міністра Юрыя Амбразевіча.
Расія лічыць неабходным удзел Беларусі ў мірных перамовах з Украінай. Пра гэта заявіла прадстаўніца МЗС Марыя Захарава, піша ТАСС.
«Мы высока цэнім і падтрымліваем мірныя намаганні Мінска, лічым важным і неабходным падключэнне нашага бліжэйшага саюзніка да магчымых перамоў, перагаворных працэсаў, якія будуць праходзіць з удзелам Расіі», — сказала яна.
Са слоў Захаравай, «улік беларускіх інтарэсаў, у тым ліку ў галіне бяспекі, належыць да абсалютных прыярытэтаў Расіі».
Днямі намеснік міністра замежных спраў Беларусі Юрый Амбразевіч заявіў, што Мінск прэтэндуе на «месца за сталом мірных перамоваў па Украіне, калі яны пачнуцца» і што Беларусь хоча атрымаць «гарантыі бяспекі».
Ва ўкраінскім МЗС яму адказалі, што Беларусь мае права прэтэндаваць толькі на «справядлівае разбіральніцтва ў рамках працэсу па прыцягненні агрэсара і яго паслугачоў» да адказнасці за злачынства агрэсіі.
Каментары
Запрашаць васалаў нават Крамлю сэнсу няма - ня тый выпадак, бо тут не ААН, дзе большасць галасоў можа нешта вырашыць. А запрашаць амаль што цалкам падкантрольнага Лукашэнку дзеля таго, каб толькі сімвалічна падняць ягоную суб'ектнасць у вачах сусвету- Крамлю ўвогуле не патрэбна. Перамовы па спыненні агню - справа вельмі жорсткая і цынічная з мінімальнай колькасцю прысутных і з большага непублічная. Тут слухаюць толькі тых, хто альбо непасрэдна здольны спыніць агонь, альбо вырашальна ўплывае на спыненне агню. Па ўсіх прыкметах - нават калі да перамоваў дойдзе, то палітычнага ўрэгулявання канфлікту там не прадугледжваецца. Бо для геапалітычна блізарукага Трампа гэта надта складана, непазбежна выкліча шмат крытыкі ў ягоны адрас, але заўважных палітычных ачкоў Трампу не дадасць. У выпадку ж простага спынення страляніны гэты нарцыс вернецца на радзіму і пад авацыю халуёў з GOP горда заявіць: "Я прывез мір!". Бо наўрадці ён ведае, хто такі Чэмберлен.