ГУР паведаміла пра падрыў расійскага вайскоўца, датычнага да ракетных удараў па Украіне
Вайсковец трапіў у эпіцэнтр выбуху, які адбыўся ў ягонай часці, і цяпер знаходзіцца пры смерці. Паводле звестак ГУР, ён датычны ў тым ліку да ракетнага ўдару па краме і кафэ ў вёсцы Гроза Харкаўскай вобласці, дзе падчас памінак 5 кастрычніка 2023 года загінула больш як паўсотня мірных жыхароў.
Пра замах на расійскага вайскоўца Канстанціна Нагайку Галоўнае ўпраўленне разведкі (ГУР) Украіны паведаміла сёння ў сваім тэлеграм-канале.
«3 студзеня 2025 года ў населеным пункце Шуя Іванаўскай вобласці на тэрыторыі Расіі адбыўся выбух, у эпіцэнтры якога апынуўся камандзір батарэі дывізіёна 112-й ракетнай брыгады 1-й танкавай арміі Заходняй ваеннай акругі Узброеных сіл РФ (в/ч 03333) капітан Канстанцін Уладзіміравіч Нагайка. Ён знаходзіўся на дзяжурстве ў сваёй ваеннай часці і цяпер знаходзіцца пры смерці. У Нагайкі шматлікія аскепкавыя пашкоджанні фактычна ўсіх органаў, у тым ліку мозгу — яму зрабілі трэпанацыю чэрапа», — паведамілі ў ГУР.
Як сцвярджаецца, расійскі вайсковец «непасрэдна ўдзельнічаў у поўнамаштабнай вайне супраць Украіны» і быў «датычны да ўдараў балістычнымі ракетамі «Іскандэр» па грамадзянскіх і ваенных аб’ектах у Сумскай і Харкаўскай абласцях».
Паводле звестак ГУР, «шанцаў на выжыванне ў 29-гадовага расійскага забойцы Нагайкі практычна няма. Яго стан крытычны».
Ракетны абстрэл вёскі Гроза Купянскага раёна Харкаўскай вобласці адбыўся 5 кастрычніка 2023 года. Ракета трапіла ў кафэ, дзе ў гэты час праходзілі памінкі. Як паведамлялася, тады загінулі 53 мірныя жыхары, сярод іх — шасцігадовае дзіця. Як высветлілася пазней, СБУ ўстанавіла асобы наводчыкаў. Імі аказаліся два мясцовыя жыхары — 30-гадовы Уладзімір Мамон і яго малодшы брат 23-гадовы Дзмітрый Мамон, якія падчас акупацыі рэгіёна перайшлі на бок Расіі.
Цяпер чытаюць
«Была галоднай, узімку аказалася без цёплых рэчаў». Суседкі расказваюць пра памерлую экс-палітзняволеную Ганну Кандраценка2
Каментары