«Туман вайны стане для УСУ значна больш густым». Да чаго можа прывесці адмова ЗША перадаваць свае разведданыя Украіне

«Вайна будуецца на разведцы, разведка — гэта вочы»

На думку вайсковага аналітыка Давіда Гендэльмана, спыненне перадачы разведданых ускладняе ўкраінскія дзеянні і ў наступе, і ў абароне.

«Вайна будуецца на разведцы, разведка — гэта вочы, і калі цяпер вочы будуць напаўзаплюшчаныя, маханне кулакамі будзе менш выніковым. Перамяшчэнні і канцэнтрацыя войскаў праціўніка, падрыхтоўка ракетных і авіяцыйных удараў па Украіне, аператыўныя планы, радыёэлектронная абстаноўка, перасоўванне і разгортванне сродкаў СПА — усё гэта адсочваецца ўсімі відамі разведкі, і на падставе гэтага УСУ плануюць свае ўласныя дзеянні і рыхтуюцца адбіваць дзеянні УС РФ», — адзначыў эксперт у размове з «Вёрсткай».

Паводле яго слоў, Украіна можа «перакрыць» разведданыя ЗША сваімі сродкамі або сродкамі саюзнікаў, але толькі часткова, а не цалкам.

«Таму калі цяпер ЗША спыняць пастаўляць разведвальную інфармацыю са свайго боку, то туман вайны стане для УСУ значна больш густым, у прамым і пераносным сэнсе», — сказаў Гендэльман.

Амерыканскія самалёты-разведчыкі дапамагаюць адсочваць узлёты расійскай авіяцыі і пускі ракет

Вайсковы аглядальнік Рускай службы Бі-бі-сі Павел Аксёнаў таксама адзначае, што ва ўкраінцаў ёсць і свае радары, перш за ўсё наземныя, якія адсочваюць абстаноўку ў паветры, але без дапамогі амерыканцаў «гэта ўсё будзе рабіць значна складаней».

«Ёсць яшчэ сродкі ў саюзнікаў, але яны, вядома, больш малалікія, чым у амерыканцаў, застануцца лятаючыя радары краін-членаў НАТА, але 24 на 7 усё адсочваць, напрыклад, ужо не атрымаецца. Дзяжурства на Чорным моры амерыканскіх самалётаў-разведчыкаў ужо не будзе, вядома, гэта зробіць жыццё расейскай авіяцыі больш лёгкім. Менш празрыстай для ўкраінцаў, у прыватнасці, будзе сітуацыя ў Крыме, таму што Крым добра відаць з Чорнага мора», — сказаў Аксёнаў у размове з «Вёрсткай».

Ён падкрэсліў, што для Украіны «адыгрывае вельмі вялікую ролю» інфармацыя з амерыканскіх самалётаў-разведчыкаў. Яны могуць адсочваць пускі балістычных і крылатых ракет, узлёт самалётаў — носьбітаў ракет, бомбаў, самалётаў тактычнай, стратэгічнай і далёкай авіяцыі.

«Гэта вялікія бамбавікі, якія відаць вельмі далёка, або самалёты МіГ-31К з ракетамі «Кінжал». Кожны вылет знішчальніка МіГ-31К — гэта трывога па ўсёй Украіне паветраная, таму што ракету «Кінжал» вельмі цяжка збіць, збіваюць яе ракетамі СПА, ракетамі Patriot, а ўлічваючы, што абмежаванне вайсковых паставак будзе тычыцца ў тым ліку гэтых ракет, то неўзабаве ўкраінскія гарады будуць значна менш абароненыя, у прыватнасці ад ракет «Іскандэр» і «Кінжал». Даныя аб паветранай абстаноўцы вельмі моцна дапамагалі супрацьпаветранай абароне ўкраінцаў», — лічыць Аксёнаў.

Прыпыненне абмену разведвальнай інфармацыяй ускладніць для УСУ нанясенне высокадакладных удараў

Па словах Аксёнава, адмова ад перадачы звестак прывядзе «да даволі вялікіх наступстваў».

«Там будзе менш інфармацыі, што адбываецца на зямлі. Гэтую інфармацыю ўкраінцы атрымлівалі са спадарожнікаў, яна вельмі моцна дапамагала ім, у амерыканцаў спадарожнікаў вельмі шмат, перыяд абнаўлення невялікі, ва ўкраінцаў была за кошт гэтага вялікая перавага перад расійскай арміяй», — адзначыў эксперт.

Крыніца сярод украінскіх вайскоўцаў у размове з «Вёрсткай» назвала адмову ад абмену разведданых «крытычнай», паколькі ў іх уваходзіць у тым ліку цэлепаказанне і актуальныя каардынаты высокай дакладнасці. Паводле слоў крыніцы, УСУ стане складаней наносіць удары па тэрыторыі Расіі рознымі ракетамі, у прыватнасці StormShadow.

«Гэта ўсё ўзаемазвязана, былі ўдары па аэрадромах, яны [расіяне] іх прыбралі далей. Адпаведна, яны вернуць бамбавікі бліжэй да мяжы і ўзмоцняць ціск. Гэта ў прынцыпе тычыцца і складоў з боепрыпасамі», — сказала крыніца.

Дональд Трамп распарадзіўся прыпыніць пастаўкі вайсковай дапамогі ЗША Украіне пасля ягонай сваркі з прэзідэнтам Украіны Уладзімірам Зяленскім. Аднак, выступаючы ў Кангрэсе 4 сакавіка, Дональд Трамп заявіў, што Зяленскі імкнецца да міру і пасля пачатку мірных перамоваў вайсковая дапамога можа быць адноўленая.

• 1
• 0
• 1
• 4
• 0
• 2
• 16
• 1