«Павінны заставацца без руху». Еўрасаюз не будзе канфіскоўваць замарожаныя расійскія актывы
Еўрасаюз спыніў дыскусію адносна магчымай канфіскацыі замарожаных расійскіх актываў. Пра гэта сведчыць тэкст высноў саміту Еўрасаюза ад 20 сакавіка, які трапіў у распараджэнне карэспандэнткі Deutsche Welle.
«У адпаведнасці з заканадаўствам ЕC, расійскія актывы павінны заставацца без руху да таго часу, пакуль Расія не спыніць сваю агрэсіўную вайну супраць Украіны і не кампенсуе ёй шкоду, нанесеную гэтай вайной», — сказана ў тэксце, прынятым лідарамі краін Еўраcаюза.
Супраць канфіскацыі больш за 200 мільярдаў еўра расійскіх актываў выступалі некалькі краін Еўрасаюза, аргументуючы сваю пазіцыю заканадаўствам ЕС, небяспекай падобнага прэцэдэнту для еўрапейскай канкурэнтаздольнасці на рынку фінансавых паслуг, неабходнасцю падтрымліваць Украіну на працэнты ад гэтых сродкаў, а таксама тым, што гэтая сума з'яўляецца «картай» на мірных перамовах і рычагом уплыву на Расію.
«Мы пачынаем думаць пра эндшпіль ва Украіне, пра мірныя перамовы, спыненне агню, мірнае пагадненне, якое можа быць падпісанае як праз 3 месяцы, так і праз 3 гады. І людзі пачынаюць разумець, што мець гэтыя актывы можа быць важней, чым канфіскаваць іх, не ведаючы пры гэтым, што з імі рабіць», — адзначыў напярэдадні саміту адзін еўрапейскі дыпламат.
Пры гэтым ЕС гатовы і надалей узмацняць ціск на Расію, у тым ліку шляхам увядзення дадатковых санкцый і ўзмацнення кантролю за выкананнем наяўных захадаў, каб аслабіць яе здольнасць весці вайну супраць Украіны, сказана ў дакуменце.
Цяпер чытаюць
Былы палітвязень знайшоў у Вільні падпрацоўку ў чаце — і трапіў пад крыміналку за правакацыі супраць Украіны25
Каментары