«Гэта мая мара з дзяцінства». На кастынг «Міс Беларусь» прыйшла дзяўчына, якая працуе ў турме Магілёва
Эвеліне Макаравай 18 гадоў. Яна працуе кантралёрам у магілёўскай турме №4. Прыгажуня кажа, што марыла пра гэтую прафесію з дзяцінства, а таксама спадзяецца на кар’ерны рост.
Эвеліна прыйшла скарыць журы на кастынг «Міс Беларусь» у Магілёве. Расказваючы пра месца працы, дзяўчына шчасліва пасміхаецца. Эвеліна сцвярджае, што гэта была яе мара дзяцінства.
Такое прызнанне здзівіла нават журы. «З дзяцінства мара працаваць у турме?» — удакладніў тэлевядучы Дзмітрый Церахаў. Спявачку Вікторыю Алешка таксама хвалявала гэтае пытанне.
— Не працаваць! — ажно свяцілася ад радасці Эвеліна. — А насіць форму, пагоны. Заўсёды хацела стаць ваеннай.
На ўдакладняючае пытанне, ці не сямейная гэта традыцыя, дзяўчына адказала, што не: такі прафесійны шлях — яе ўласнае жаданне і асэнсаваны выбар. Кажа, што заўжды захаплялася людзьмі ў форме.
— Вось нават на парад. Я глядзела ў дзяцінстве і мне хацелася таксама.
Але ж журы не супакойвалася. Маўляў, форму ж можна ў розных месцах насіць, чаму прыгажуня ў турму працаўладкавалася.
— Так атрымалася, што я сюды патрапіла. Наогул я паступала ў наш магілёўскі інстытут МУС па накіраванні ад ДАІ. Але так атрымалася, што не хапіла балаў (але бал у мяне быў добры). Скончыла ў Мінску тры месяцы першапачатковай падрыхтоўкі. І вось накіравалі ў турму.
Эвеліна расказала, што працуе кантралёрам-аператарам. Па словах дзяўчыны, яна сядзіць у дзяжурнай часці і ажыццяўляе нагляд за асуджанымі.
— Вельмі цікава! — адзначыла тэлевядучая Таццяна Рудакоўская. — Калі вы знаёміцеся з хлопцам і ён пытаецца, дзе вы працуеце, што вы адказваеце?
— У турме! — смяецца Эвеліна.
Дзяўчына прызнаецца, што звычайна такі адказ усіх шакіруе. Людзі кажуць, што знешне ніколі б не падумалі. Мінімум наступныя пяць гадоў Эвеліна думае працаваць на тым жа месцы.
Цяпер яна малодшы сяржант. Сёлета плануе зноў паступаць — на завочнае аддзяленне па накіраванні. Пасля атрымання дыплому спадзяецца стаць лейтэнантам.
На пытанні, дзе ж хочацца працаваць далей, Эвеліна крыху падвісла. Кажа, у Следчым камітэце дакладна сябе не бачыць. Імаверна паспрабуе ўладкавацца ў лячэбна-працоўны прафілакторый, бо там у яе ёсць знаёмыя дзяўчыны.
Спявачка Насця Краўчанка, якая атрымлівала адукацыю ў Інстытуце тэалогіі БДУ, стамілася ад размоў пра турму і пацікавілася ў прэтэндэнткі на карону каралевы прыгажосці, якую адну памылку ў жыцці тая хацела б выправіць.
— Нават не ведаю. Я задаволена тым, як я дзейнічаю. Зараз мяне ўсё задавальняе.
Эвеліна прызнаецца, што на кастынг прыйшла, бо і родныя, і знаёмыя, і нават калегі кажуць: «Ой ну мадэль!».
Прыдворны кампазітар Яўген Алейнік глядзеў на дзяўчыну закаханымі вачыма:
— Вы атрымоўваеце прыз «Павышаны інтарэс журы». Таму што вельмі незвычайнае спалучэнне такой анёльскай знешнасці і месца працы.
Аўтар ліслівых песень для Лукашэнкі не ўтрымаўся ад правакацыйнага пытання:
— А вам дазваляюць весці сацыяльныя сеткі?
Эвеліна спакойна адказала, што дазваляюць, але «каб лішняга нічога не было».
Дарэчы, працоўныя будні па зразумелых прычынах Эвеліна не паказвае ў сваіх сацыяльных сетках. Затое любіць выкладаць здымкі, на якіх яна дэманструе шыкоўнае жыццё: сядзіць у дарагім рэстаране, пазіруе з вялізарным букетам кветак ці адпачывае ў Дубаі.
У закулісе кастынгу Эвеліна таксама запісала невялікае інтэрв'ю для тыктоку. Зноў распавяла пра мару дзяцінства, але ў гэты раз прагучала пра «служыць Радзіме».
Тыктокерка папрасіла падзяліцца ўражаннямі, як такой прыгожай дзяўчыне працаваць у турме.
— Мне падабаецца. Стаўленне добрае. Усё добра.
Дзяўчына ўдакладніла, што да такой працы трэба быць маральна падрыхтаванай. Але ж лічыць, што спраўляецца і ганарыцца сабой.
Эвеліна распавяла, што, хоць яна і не планавала трапіць у турму, але ўсе сваякі добра паставіліся да яе першага месца працы.
— Усе «за», усе мяне падтрымліваюць. Мама кажа, што сама б пайшла, калі б узрост дазваляў.
Каментары