У Польшчы расследуюць вялікую справу аб адпраўцы наркотыкаў праз пачкаматы. Сярод абвінавачаных — беларус
У Польшчы расследуюць справу аб перасылцы наркотыкаў праз пачкаматы. Удзельнікі злачыннай групы сартавалі і фасавалі забароненыя рэчывы, а затым рассылалі іх пакупнікам як пасылкі.
Абвінавачванні выстаўленыя васьмі фігурантам — гэта шэсць украінцаў, паляк і беларус. Аб справе распавялі ў Акруговай пракуратуры Гданьска, піша Most.
Група займалася рэчывам α‑PVP. У адной пасылцы магло быць ад 2 да 20 грам рэчыва, расфасаваных па дозах. Атрымальнікі былі не спажыўцы, а закладчыкі. Яны павінны былі пакінуць наркотык у месцы, якое вызначалі каардынатары, і зрабіць фатаграфіі. Па іх дозы затым знаходзілі спажыўцы.
На сёння вядома пра 700 адпраўленых пасылак. І 7 кілаграмаў прэпаратаў коштам каля 1 млн злотых (250 тысяч еўра) было канфіскавана ў ходзе вобшукаў у сямі гарадах, у тым ліку ў Варшаве, Гданьску, Познані.
Там жа затрымалі восем мужчын. Шасцёра з іх — грамадзяне Украіны, адзін — паляк і адзін — беларус. Гэта 36-гадовы Андрэй П.
Усім мужчынам выстаўленыя абвінавачванні ў продажы значнай колькасці псіхатропных рэчываў і ўдзеле ў арганізаванай злачыннай групе, а двум грамадзянам Украіны — Раману С. і Яраславу З. — яшчэ і ў кіраўніцтве злачыннай групай. Магчымых кіраўнікоў часова арыштавалі на тры месяцы. Супраць астатніх уведзены паліцэйскі нагляд, ім забаронены выезд з краіны.
За продаж наркотыкаў можа пагражаць да 12 гадоў пазбаўлення волі, за ўдзел у злачыннай групе — ад 3 месяцаў да 5 гадоў, а за кіраўніцтва — ад 2 да 15 гадоў.
Следства працягваецца, пракуратура папярэдзіла, што магчымыя далейшыя затрыманні.
Хто тая беларуска, якую экстрадавалі ў ЗША для суда за кантрабанду дэталяў для самалётаў8
Каментары