Каля Лукашэнкі зноў з'явіўся Усевалад Янчэўскі і паабяцаў перазагрузку ПВТ

У сваім каментарыі Усевалад Янчэўскі з настальгіяй згадаў пра прыняты ў далёкім 2017 годзе дэкрэт №8, які на той час быў «у многім рэвалюцыйны», і перакінуў масток у сённяшні дзень.

«Зразумела, што за гэты час вельмі многае ў свеце памянялася. І яно змянялася, мяняецца і будзе мяняцца. Прычым тэмп паскарэнняў, хуткасць пастаянна ўзрастаюць. Прыйшоў час для перазагрузкі, і сёння кіраўнік дзяржавы вельмі выразна, ясна, зразумела і вельмі справядліва вызначыў некалькі прыярытэтаў», — сказаў ён.

Паводле слоў Янчэўскага, сёння галоўны прыярытэт — абарона інтарэсаў кожнага грамадзяніна. Ніводзін махляр або сумнеўная структура, маўляў, не павінны мець магчымасць абабраць або ашукаць беларуса. 

Але адначасова з гэтым нібыта ствараецца свабодны шлях для прагрэсу, тэхналогій і інавацый, а ўсё, што спрыяе развіццю краіны, падтрымлівацца дзяржавай і асабіста Лукашэнкам. Пры ўкараненні інавацый трэба абапірацца на сусветны досвед, але таксама спрабаваць яго апярэдзіць, каб Беларусь і яе заканадаўства заставаліся прыкладам для іншых краін.

Пры гэтым Усевалад Янчэўскі анансаваў перазагрузку ў працы ПВТ і заявіў, што бачыць для гэтага перадумовы, зноў не забыўшыся зрабіць камплімент Лукашэнку:

«Упэўнены, мы гэта ўбачым. Будзе і перазагрузка Парку высокіх тэхналогій. Некалькі этапаў было ў яго развіцці. Думаю, што вельмі хутка будзе наступны. Пад натхненнем кіраўніка дзяржавы Парк высокіх тэхналогій атрымае вельмі магутнае і цікавае развіццё».

Цяпер 49-гадовы Усевалад Янчэўскі ў 1990-я гады стаяў ля вытокаў цяперашняга БРСМ, у 1997-2001 гадах будучы першым сакратаром ЦК Беларускага патрыятычнага саюза моладзі (так гэта арганізацыя называлася тады). Пасля ён быў дэпутатам Палаты прадстаўнікоў, галоўным рэдактарам часопіса «Планета», галоўным ідэолагам адміністрацыі Лукашэнкі.

З 15 сакавіка 2017 года па 2023 год Усевалад Янчэўскі быў дырэктарам адміністрацыі Беларускага парка высокіх тэхналогій, на ягоныя гады кіравання прыпаў як яго росквіт, так і заняпад пасля палітычнага крызісу 2020 года і пачатку вайны ва Украіне ў лютым 2022-га.

Пасля сыходу з пасады кіраўніка ПВТ Янчэўскі адышоў у цень і ўзначаліў юрыдычную асобу ў Аб'яднаных Арабскіх Эміратах, якую адкрывалі як фінансавую пракладку для ПВТ. Праз яе збіраліся пераводзіць грошы тых беларускіх ІТ-кампаній і замежных замоўцаў, якія не могуць працаваць наўпрост з Беларуссю пасля пачатку поўнамаштабнай вайны ва Украіне. 

• 1
• 3
• 4
• 4
• 0
• 0
• 4
• 0