Урад Вялікабрытаніі паставіў Украіне новую партыю дальнабойных крылатых ракет Storm Shadow для удараў углыб Расеі, паведамляе Bloomberg са спасылкай на крыніцы. Колькі менавіта ракет перададзена, не паведамляецца.
Лондан перадаў Кіеву партыю Storm Shadow, каб забяспечыць Узброеныя сілы Украіны запасамі напярэдадні зімы. Па словах суразмоўцаў агенцтва, брытанскі ўрад занепакоены, што ў гэты перыяд Масква можа ўзмацніць атакі.
Яшчэ адной прычынай дадатковых паставак брытанскіх крылатых ракет стала рашэнне прэзідэнта ЗША Дональда Трампа не перадаваць Кіеву амерыканскія «Тамагаўкі», піша Bloomberg.
У канцы кастрычніка CNN паведамляў, што Пентагон далажыў Трампу пра гатоўнасць перадаць Кіеву ракеты Tomahawk. Ведамства запэўніла, што гэта не адаб'ецца на яго ўласных запасах зброі. Але прэзідэнт ЗША заявіў, што «на самай справе не разглядае» адпраўку Tomahawk ва Украіну. Пры гэтым ён дапусціў, што можа перадумаць.
УСУ ўпершыню выкарысталі брытанскую дальнабойную зброю для ўдараў па аб'ектах на расійскай тэрыторыі ў лістападзе 2024 года. Расія ў адказ атакавала Украіну балістычнай ракетай «Арэшнік» у бяз'ядзерным гіпергукавым забеспячэнні.
Лондан не раскрывае, калі і колькі дальнабойных крылатых ракет было пастаўлена Кіеву. У верасні брытанскі прэм'ер-міністр Кір Стармер паведаміў, што краіны «кааліцыі ахвотных» гатовыя забяспечваць Украіну ракетамі большай далёкасці, але не ўдакладніў параметры магчымых паставак.
Каментуючы падобныя заявы, прэс-сакратар Пуціна Дзмітрый Пяскоў адзначаў, што яны супярэчаць «памкненням на выхад да палітычнага ўрэгулявання» канфлікту на Украіне, а рашэнні заходніх краін перадаваць Украіне дальнабойныя ракеты з'яўляюцца «небяспечнымі».
Ва Украіне заявілі, што знішчылі адзін расійскі «Арэшнік» проста на палігоне
ЗША знялі ключавое абмежаванне на ўдары дальнабойнымі ракетамі па Расіі — WSJ
Зяленскі: Украіна мае ўласную зброю для далёкіх удараў па Расіі без узгаднення з ЗША
Што вядома пра крылатую ракету «Фламінга». Ці дастане яна да Масквы і вытворчасцяў шахедаў?
Каментары