«Новая версія дактрыны Манро ад Трампа». У чым сутнасць новай стратэгіі нацыянальнай бяспекі ЗША 

Асноўная ідэя стратэгіі — ЗША больш не будуць аўтаматычна апекавацца слабейшымі партнёрамі. Замест гэтага яны пераходзяць да мадэлі дачыненняў, заснаванай на ўзаемнай выгадзе. Гэта тычыцца перш за ўсё Еўропы і афрыканскіх краін. Сярод іншага плануецца скараціць вайсковую дапамогу еўрапейцам, каб Еўропа больш разлічвала на ўласныя сілы.

Амерыканская адміністрацыя крытыкуе Еўропу за палітыку, якая, на іх думку, вядзе кантынент да ўнутранага аслаблення — перадусім гаворка пра міграцыю.

У дакуменце сцвярджаецца, што Еўропа страціла частку сваёй ідэнтычнасці і ўпэўненасці, таму і ўспрымае Расію як экзістэнцыяльную пагрозу, хоць у вайсковым плане (акрамя ядзернай зброі) мае значную перавагу.

ЗША лічаць за адзін са сваіх галоўных інтарэсаў як мага больш хуткае спыненне баявых дзеянняў ва Украіне. Гэта, паводле стратэгіі, павінна стабілізаваць еўрапейскую эканоміку, знізіць рызыку эскалацыі і стварыць умовы для адбудовы Украіны. Вашынгтон падкрэслівае, што для паспяховай канкурэнцыі і стрымлівання супраціўніка яму патрэбна моцная Еўропа.

Унутры краіны ЗША робяць акцэнт на бяспецы і абароне нацыянальных інтарэсаў. Асноўныя задачы:

• абарона грамадзян і эканомікі ад ваенных пагроз і замежнага ўплыву — ад шпіянажу да прапаганды;
• поўны кантроль над межамі і міграцыяй;
• падтрымка наймацнейшага і самага тэхналагічнага войска ў свеце;
• развіццё сучаснага ядзернага арсеналу і стварэнне новай супрацьракетнай абароны, уключна з сістэмай «Залаты купал»;
• будаўніцтва самай магутнай і інавацыйнай эканомікі.

Таксама ЗША плануюць умацоўваць прамысловую базу, павялічваць вытворчасць абаронных тэхналогій, развіваць энергетыку і навуковы патэнцыял.

Вашынгтон абвяшчае вяртанне да прынцыпаў дактрыны Манро — ідэі, паводле якой ЗША з’яўляюцца галоўнай сілай у заходнім паўшар'і і маюць права ўплываць на сітуацыю ў краінах рэгіёна. Гэты падыход у дакуменце названы «новай версіяй дактрыны Монро ад Трампа».

ЗША хочуць узмацніць супрацоўніцтва з дзяржавамі Амерыкі ў барацьбе з картэлямі і транснацыянальнай злачыннасцю. На глабальным узроўні Вашынгтон бачыць сваю ролю ў падтрыманні бяспекі Еўропы, недапушчэнні дамінавання Ірана на Блізкім Усходзе і пашырэнні інвестыцый у рэгіёне, уключна з высокатэхналагічнымі галінамі.

У дачыненнях з Афрыкай ЗША хочуць адысці ад аднабаковага «дапаможнага» падыходу і перайсці да партнёрства, заснаванага на гандлі ды інвестыцыях. Асаблівую ўвагу плануюць надаваць энергетычнаму сектару і здабычы рэдкіх мінералаў.

У дакуменце падкрэсліваецца, што краіна ўжо валодае большасцю рэсурсаў, неабходных для рэалізацыі амбіцый: гнуткай палітычнай сістэмай, найбуйнейшай эканомікай, фінансавай сілай даляра, тэхналагічным лідарствам, магутным войскам, шырокай сеткай звязаў і багатымі прыроднымі рэсурсамі.

Стратэгія ставіць мэту ўмацаваць глабальнае першынство Амерыкі і зрабіць яе, як сцвярджаюць аўтары, «мацнейшай, чым калі-небудзь».

• 6
• 0
• 3
• 6
• 0
• 1
• 1
• 0