Украінская дзяўчына ў 2022 годзе пачала вучыць беларускую мову, а цяпер вядзе беларускамоўны блог
«Нядаўна я прачнулася з жаданнем весці старонку ў тыктоку па-беларуску. І чаму я павінна сабе адмаўляць?». Вікторыя распавяла «Нашай Ніве», калі зацікавілася беларускай мовай і як да яе захаплення ставяцца суайчыннікі і беларусы.
Вывучаць беларускую мову Вікторыя пачала ў 2022 годзе. На пытанне, чаму менавіта тады — бо калі пачалася вайна, шмат хто з украінцаў негатыўна ставіўся да беларусаў — дзяўчына адказвае:
— Я толькі ў 2022 годзе пачула беларускую мову ўпершыню. У гэты перыяд мне пачалі трапляцца відэа па-беларуску ў тыктоку. А час пачатку вывучэння ніяк не залежыць ад вайны. Я да беларусаў з адэкватнай пазіцыяй негатыўна ніколі не ставілася і беларуская мова не мае ніякага дачынення да таго, што адбываецца.
З хэйтам з боку суайчыннікаў праз сваю цікавасць Вікторыя амаль не сутыкаецца. Кажа, што нейкая крытыка, хутчэй, выключэнне з правіл, бо звычайна ўкраінцы добра ставяцца да беларускай мовы.
Беларусы ж у большасці падтрымліваюць і пішуць прыемныя словы ды падзякі ў каментарах. Але час ад часу прыходзяць і хэйтары — канечне, рускамоўныя.
За падручнікамі Вікторыя не сядзела — яна проста слухала кантэнт на беларускай: глядзела ролікі ў тыктоку, на ютубе, слухала музыку. Яе любімыя беларускія музыкі — гэта гурты «Няміга», Adarvirog, Sumarok і Relikt.
У адным з першых відэа ў тыктоку «Украінка па-беларуску» Вікторыя дзеліцца тым, што ж яе здзівіла, калі яна пачала вучыць беларускую.
— Здзівіла тое, што я амаль усё разумела. Канечне, шмат слоў адрозніваюцца ад украінскай мовы. Але, калі я вывучыла базавыя словы кшталту «шмат», «менавіта» і гэтак далей, 90% размоўнай мовы стала зразумелай.
А вось другі пункт — гэта адсутнасць суразмоўцаў.
— Зараз шмат беларускамоўных людзей нават тут, у тыктоку. Але калі я пачынала ў 2022 годзе, я шукала суразмоўцаў у такіх праграмах як «Тандэм» для моўнага абмену. На жаль, было шмат сітуацый, калі высвятлялася, што нават людзі, якія пазначылі беларускую як родную, яе не ведалі.
Крыху заблыталі дзяўчыну і розныя варыянты правапісу — наркамаўка і тарашкевіца.
— Спачатку я не магла зразумець, што, як і навошта. Але пазней стала ўсё зразумела. Цяпер я хачу перайсці на класічны правапіс. Але пакуль што больш карыстаюся наркамаўкай.
Наяўнасць некалькіх алфавітаў таксама стала сюрпрызам. Вікторыя вельмі здзівілася, калі пабачыла каментары ў сацсетках.
— Лацінку я яшчэ магу зразумець. Але арабіца?!
Спачатку Вікторыя спрабавала перакладаць словы ці нават цэлыя сказы з украінскай на беларускую. Але адзначае: некалькі гадоў таму гугл-перакладчык працаваў так жудасна, што ёй прыходзілася выцягваць з глыбіні памяці веды рускай мовы.
Праз паўгода рэгулярных размоў на беларускай (калі не кожны дзень, дык праз дзень дакладна), Вікторыя пачала ўжо размаўляць амаль свабодна.
Ніякіх канспектаў не рабіла, нічога не занатоўвала. Дзяўчына запэўнівае: калі 10 разоў перакладзеш слова, на адзінаццаты ўжо згадаеш яго сама.
Часам у каментары прыходзяць людзі, якія пытаюцца, навошта ўкраінцы беларуская мова — тым больш, што яна не мае беларускіх каранёў. Вікторыю такое пытанне здзіўляе.
— Я лічу, што беларуская мова вартая таго, каб яе ведалі і на ёй размаўлялі. Не разумею, чаму людзі здзіўляюцца таму, што я вучу беларускую. У вас што, няма нейкіх захапленняў, чагосьці, што вам падабаецца? Дык а навошта вы гэта робіце? Ці лічу я, што беларуская мне непатрэбная? Не, бо я пазнаёмілася з цудоўнымі людзьмі, даведалася шмат цікавага.
Пры гэтым, Вікторыя прызнаецца, што не валодае свабодна рускай мовай — таму людзі, якія патрабуюць ад яе ў каментарах размаўляць на рускай, прыводзяць яе ў ступар.
— Чаму некаторыя людзі думаюць, што свет круціцца вакол рускай мовы? Я вырасла ў цалкам украінамоўным асяроддзі, ніколі не вывучала рускую. Таму што ў маім горадзе ў школах яе не вывучаюць як мінімум гадоў 20. Я нават не ўмею адэкватна ёй размаўляць. Можа, калі патрэніравацца, дык атрымаецца. Але навошта? Для мяне гэта замежная мова, якую я крыху ведаю, бо ў маім дзяцінстве было шмат фільмаў і серыялаў на ёй. Зараз ніякай карысці яна для мяне не нясе. Але чамусьці некаторыя людзі не могуць асэнсаваць, што руская мова патрэбна не ўсім.
Цяпер Вікторыя падпісана на шмат беларускамоўных людзей у тыктоку, розныя адукацыйныя старонкі.
— Часам магу паглядзець нешта на «Кінаканапе», часам чытаю беларускую літаратуру — але на чытанне ўсё ж звычайна часу не хапае.
Напрыканцы размовы Вікторыя дадае:
— Беларуская мова для мяне адна з найбольш прыгожых у свеце, і я хацела б падтрымаць беларусаў і беларускую мову ў гэты нялёгкі для вас і для нас час. Бо калі адныя людзі не разумеюць, навошта людзям беларуская, то іншыя робяць усё што могуць для яе развіцця. І я хацела б быць часткай гэтай вялікай справы.
«Наша Нiва» — бастыён беларушчыны
ПАДТРЫМАЦЬ«Чаму беларусы не знялі Лукашэнку?» Украінская блогерка тлумачыць суайчыннікам, што адбываецца ў Беларусі
Цой прывёў да Багдановіча: японскі адвакат распавёў, як зацікавіўся беларускай культурай і вывучыў мову
Жарты бразільца пра Беларусь разышліся па сацсетках. Ябацькі ўжо называюць яго бэчэбэшнікам
Амерыканка расказала, як выкладала ва ўніверсітэце ў Віцебску і нават дала пару ўрокаў міліцыі
Каментары