У Мінску ў 2026 годзе плануюць значна пашырыць азеляненне горада. Пра гэта паведаміла кіраўніца службы па ўпарадкаванні прадпрыемства «Мінскзялёнбуд» Наталля Лісоўская.
Вясной у сталіцы збіраюцца высадзіць больш за 10 тысяч дрэў і каля 50 тысяч кустоў. Асноўную ўвагу нададуць азеляненню ўздоўж гарадскіх вуліц і Мінскай кальцавой дарогі. Восенню плануецца дадаткова пасадзіць прыкладна 100 тысяч кустоў, але канчатковыя планы вызначаць пасля абследавання зялёных насаджэнняў пасля зімы.
У горадзе будуць шырока выкарыстоўвацца розныя дэкаратыўныя кусты — у тым ліку бэз, гартэнзія, вяйгела, спірэя і кізільнік.
Асобная ўвага надаецца кветкаваму афармленню. Усяго ў Мінску высадзяць каля 1,26 мільёна аднагадовых кветак. Сярод найбольш папулярных — бягонія, цынерарыя, пятунія, тагетэс, колеусы і пеларгонія. Акрамя таго, плануецца пасадзіць каля 100 тысяч шматгадовых раслін. Таксама ў розных раёнах горада з’явіцца каля 50 тысяч кустоў руж, у тым ліку мініяцюрныя сарты ў вертыкальных канструкцыях.
Працягнецца і выкарыстанне падвясных кашпо з кветкамі ўздоўж дарог. У мінулым годзе такія кампазіцыі з марозаўстойлівымі раслінамі ўпершыню з’явіліся на праспекце Пераможцаў і добра сябе засведчылі. Таму цяпер іх плануюць усталяваць і ў іншых частках горада — на праспектах Дзяржынскага і Партызанскім, а таксама на вуліцах Арлоўскай, Прытыцкага і іншых магістралях. Усяго размесцяць каля 8 тысяч кашпо.
У маі на агароджах уздоўж раздзяляльных палос з’явіцца каля 17 тысяч кашпо з летнімі ампельнымі кветкамі, напрыклад пятуніямі і іпамеяй. Увосень іх заменяць на хрызантэмы, для якіх плануюць усталяваць больш за 12 тысяч спецыяльных скрынак.
Акрамя таго, у горадзе з’явяцца новыя малыя архітэктурныя формы. Іх усталююць, у прыватнасці, уздоўж праспекта Пераможцаў, у скверы каля Палаца спорту і ў іншых важных месцах сталіцы.
Каментары