Расійскі прадавец паспяховага поспеху паспрабаваў адкрыць філіял у Мінску. Рэакцыя беларусаў была паказальнай

У расіяніна Міхаіла Грабянюка рэпутацыя неадназначная: нехта лічыць яго геніяльным бізнэс-трэнерам, а нехта чарговым махляром, які прадае паспяховы поспех.

СМІ паведамлялі, што Міхаіл нарадзіўся ў падмаскоўнай Балашысе ў сям'і маёра ФСБ. Бацька марыў, каб сын паступіў у акадэмію ФСБ і таксама стаў вайскоўцам, але хлопец абраў іншы шлях. Ён доўга займаўся спартыўнымі бальнымі танцамі, займаў прызавыя месцы на чэмпіянатах Еўропы, а потым паступіў у педагагічны інстытут і вывучыўся на настаўніка гісторыі. Па прафесіі адпрацаваў два гады, а потым паспрабаваў распачаць нейкі бізнэс.

Цяпер жа Міхаіл Грабянюк вучыць іншых зарабляць шалёныя грошы. На яго YouTube-канале перыядычна выходзяць відэаразборы. Робяцца яны так: Міхаіл прыязджае ў нейкі горад, ладзіць сустрэчу пад камерамі з нейкім мясцовым бізнэсоўцам і на вачах публікі разбірае складаныя для суразмоўцы пытанні яго бізнэсу. І заадно прадае свае кансультацыйныя паслугі па стварэнні аддзелаў продажаў.

Падчас чарговага разбору ў Чалябінску Міхал распавёў пра свой правал у Мінску (імаверна, гаворка ідзе пра 2018 год — менавіта тады бізнэс-трэнер ладзіў персанальны трэнінг у беларускай сталіцы).

Па словах Міхаіла, аднойчы ён вырашыў, што яго кампанія павінна быць міжнароднай, і адкрыў першы філіял у Мінску.

— Я знайшоў чувакоў-партнёраў, якія сабралі людзей на мой майстар-клас у Мінску. У Беларусі, дзе кожны трэці жыхар — гэта міліцыянер, а не прадпрымальнік. Па статыстыцы там кожны трэці сілавік, ну, можа, кожны чацвёрты. Дзе ўсё насельніцтва як маскоўскае Чартанава. То-бок усё насельніцтва Беларусі — 10 мільёнаў чалавек, а насельніцтва толькі Масквы — 25‑30 мільёнаў. І яшчэ эканамічна на душу насельніцтва вы разумееце, якая розніца — Масква ці Расія і Беларусь.

Атрымалася прадаць каля 300 квіткоў. Спікер планаваў, што як заўсёды лёгка прадасць са сцэны свае іншыя інфа-прадукты, але ўсё пайшло не па плане.

— Спачатку я кажу: «Беларусы, падыміце руку, хто зарабляе больш за мільён чыстага прыбытку штомесяц» (напэўна, гаворка ідзе пра расійскія рублі. У 2018 годзе гэта было каля $15 тысяч — НН). І ніхто не падняў. Не таму, што яны не зарабляюць. А таму, што яны на такія пытанні не адказваюць ніколі. Нідзе. Ад граху далей.

Кажа, што пытанні, пра прыбытак у 500 тысяч і 2 мільёны рублёў (адпаведна, $7500 і $30 тысяч на месяц — НН) таксама засталіся без адказаў. А калі трэнер пацікавіўся, хто ж з прысутных бізнэсоўцаў хоча моцна вырасці, яму падалося, што людзі наадварот яшчэ і схавалі рукі.

— Карацей, гэта быў самы тупы майстар-клас у маім жыцці. Гэта быў поўны правал. Я распальваў болі, эмоцыі, прэзентацыя… Спецпрапанова: першым беларусам зніжка на старт працы з нашым аддзелам продажу… Зніжка, можна пайсці аформіць. Калі я так рабіў у Расіі, людзі ішлі і куплялі. Уносілі перадаплату, імкнуліся першыя 20 пакетаў купіць…

Але ў Мінску ніхто не падняўся са свайго месца, каб скарыстацца такой прапановай. Міхаіл успамінае, як ён стаіць на сцэне, 300 чалавек глядзяць на яго з усмешкай, а супрацоўнікі за сталамі стаяць і чакаюць нечага. Трэнер уздыхнуў і сказаў: «Ну вось такая прапанова ў нас ёсць…». Публіка адрэагавала ціхім смехам.

— І я закрыў філіял у Беларусі.

@sergey_zhushma

Вот основная проблема белорусского предпринимателя, а не внешние условия

♬ оригинальный звук - Сергей Жушма

На гэтае відэа Грабенюка звярнуў увагу беларускі тыктокер Сяргей Жушма, які спрабуе пайсці шляхам Міхаіла. Сяргей называе сябе лідарам бізнэс-клуба «Анамалія» (гэта прадукт Грабенюка) у Беларусі. І сам ужо абяцае «перасабраць мысленне прадпрымальнікаў і мадэль бізнэсу».

Сяргей цікавіцца ў сваіх падпісчыкаў: «У чым асноўная праблема беларускіх прадпрымальнікаў?». Але асаблівага энтузіязму ў каментарах не назіраецца.

Нават прыхільнікі Грабенюка лічаць, што яго досвед не каціруецца ў Беларусі: «Калі нехта недзе паспеў зарабіць, ніколі не распавядзе, як канкрэтна і дзе».

А нехта жартуе, што галоўную праблему Міхаіл адразу і агучыў: «Статыстыка пра кожнага трэцяга жыхара».

• 2
• 1
• 61
• 8
• 0
• 0
• 0
• 0