Памятаеце «Сход неабыякавых»? Ён яшчэ жывы, але тэлеграм-чат у іх ужо скралі
Стваральнікі чата ратаваліся ад «атакі ботаў» — і ў працэсе змагання згубілі доступ да свайго ж чата.
Апазіцыйная і да Аляксандра Лукашэнкі, і да Святланы Ціханоўскай ініцыятыва «Сход неабыякавых» паведаміла падпісчыкам, што іх чат выйшаў з-пад кантролю арганізатараў і цяпер кіруецца невядомымі асобамі.
У чаце па старой спасылцы вісіць паведамленне ад імя ініцыятывы пра нібыта «самароспуск»: у ім «Сход» быццам бы прызнае ўласную «некампетэнтнасць» і заклікае рух распусціцца. Сама ініцыятыва ад гэтага паведамлення адмяжоўваецца — яго пакінулі тыя, хто перахапіў спасылку.
У афіцыйным канале «Сходу неабыякавых» сітуацыю патлумачылі так: на чат была «атака ботаў», пасля чаго спасылку на ўступленне выдалілі, а старонку па ёй, паводле ініцыятывы, узяла пад кантроль «рэжымная агентура». Удзельнікаў папярэджваюць не дадавацца па старой спасылцы.
Як такое атрымалася? Тое, што адбылося, — не «ўзлом» у звыклым сэнсе. Зламыснікам не спатрэбілася ні пароляў, ні доступу да акаўнтаў арганізатараў. У аснове ляжыць механізм, вядомы як перахоп вызваленага імені.
У тэлеграмаўскай спасылкі на чат быў публічны адрас (юзернейм). Калі арганізатары, паводле іх уласных слоў, рэагавалі на «атаку ботаў» і прыбралі спасылку на ўступленне, гэты адрас вызваліўся і стаў даступны каму заўгодна. Хтосьці адразу стварыў новы чат і прысвоіў яму той самы адрас. У выніку старая спасылка, якая дагэтуль вісіць у матэрыялах ініцыятывы і ў дзясятках перапостаў, цяпер вядзе не да «Сходу», а ў чат пад кантролем зламыснікаў. Менавіта там і з'явіўся фальшывы допіс пра «самароспуск».
Галоўная памылка ініцыятывы ў тым, што, прыбіраючы публічны адрас, яны не ўлічылі: вызвалены адрас не знікае, а трапляе ў агульны доступ.
Паралельна з'явілася і падробка самога канала. Арыгінальны канал ініцыятывы мае адрас @sxod_by, а ў клона — @sxob_by: розніца ўсяго ў адной літары, разлічаная на тое, што чытач не заўважыць падмены.
Наўрад ці нехта звярнуў бы ўвагу на фэйл стваральнікаў напаўмёртвага канала і чата, калі б пра гэта не стаў актыўна пісаць ананімны тэлеграм-канал «Беларуская агентура». Невядома, хто за ім стаіць — ці то сілавікі, ці тое нехта з актывістаў апазіцыі, каму ў радасць высмейваць памылкі «Сходу неабыякавых» і іншых апанентаў Ціханоўскай. У выніку «Беларуская агентура» адначасова выступае і ў ролі таго, хто выявіў праблему, і прапануе ўласныя паслугі па кібербяспецы.
-
На Беласточчыне прайшоў фестываль беларускай традыцыі Soncahraj ФОТЫ
-
Жонка Аляксандра Мілінкевіча расказала пра ягоны стан: памяць захавалася, але з рухальным апаратам вялікія праблемы
-
«Я ў калоніі быў больш вольны». Былы палітвязень Тамаз Піпія расказаў пра 6 гадоў за кратамі і новую паранаідальную беларускую рэальнасць
Каментары
Калі доступ да чату атрымалі сілавікі, то гэта патэнцыйна небяспечных для ўсіх хто там быў.