Падводныя археолагі знайшлі каля нямецкага горада Ліндау, што на востраве ў Бодэнскім возеры, драўляныя рэшткі старажытнага судна, якое, паводле папярэдніх ацэнак, затанула ў XV стагоддзі. Адкрыццё ўжо называюць адной з найбольш значных знаходак апошніх гадоў, бо падобныя караблі гэтага перыяду на возеры сустракаюцца вельмі рэдка, піша Euronews.
Пра магчымыя рэшткі судна даследчыкам паведаміў спартыўны дайвер, які добра ведаў гэты ўчастак возера. Падчас абследавання дна археолагі знайшлі шпангоўты і часткі драўлянай абшыўкі корпуса, што дазволіла ўпэўнена сцвярджаць: перад імі сапраўды рэшткі карабля, а не выпадковыя драўляныя фрагменты.
Паводле папярэдніх ацэнак, судна мела даўжыню ад васьмі да дванаццаці метраў і шырыню каля трох метраў. Асаблівую цікавасць выклікаў яго ўзрост. Спачатку спецыялісты меркавалі, што карабель адносіцца да больш позняга перыяду, аднак аналіз узору драўніны паказаў, што ён быў пабудаваны паміж 1420 і 1450 гадамі.
Навукоўцы адзначаюць, што да гэтага часу на Бодэнскім возеры было вядома толькі некалькі караблекрушэнняў позняга Сярэднявечча. Таму новая знаходка можа дапамагчы лепш зразумець асаблівасці суднабудавання і суднаходства таго часу.
Пакуль даследчыкі правялі толькі два апусканні. Яны зафіксавалі размяшчэнне рэшткаў судна, выканалі іх фотаздымку і ўзялі адзін узор драўніны для датавання. Надалей плануецца правесці дадатковыя даследаванні, каб удакладніць канструкцыю і сапраўдныя памеры карабля.
Падымаць судна на паверхню пакуль не плануюць. Паводле спецыялістаў, такая аперацыя патрабуе вялікіх фінансавых выдаткаў, а пасля ўзняцця ўсе драўляныя элементы неабходна доўга і складана кансерваваць. Акрамя таго, пад вадой і пад пластом донных адкладаў знаходка захоўваецца значна лепш, чым на паветры.
Археолагі лічаць, што далейшае вывучэнне карабля дазволіць атрымаць новыя звесткі пра гісторыю суднаходства на Бодэнскім возеры і жыццё людзей у познім Сярэднявеччы.
З возера ў Швейцарыі дасталі груз 2000‑гадовага судна — гладыятарскія мячы, манеты, посуд
«Пад метровым шурфам — каменная шліфаваная сякера». Археолагі расказалі пра важныя вынікі сёлетніх падводных раскопак
На дне палескага Князь-возера адшукалі замак «Венецыя» — капрыз Радзівіла
Даследчыкі дзесяцігоддзямі памыляліся наконт касцёла ў Будславе. Археалагічныя знаходкі абверглі старыя тэорыі
Цяпер чытаюць
«Бульба» з Оршы пайшоў ваяваць за Расію — цяпер сястра шукае яго ці хаця б яго парэшткі8
Каментары
А у 15 ст. чоўны, проста чоўны, г.з. ні кліпераў, ні шхун з брыгантынамі ды баркентынамі па Нарачы не хадзіла... Уключыце ўрэшце лёгіку, адкуль там узяцца тым галерам ?
[Зрэдагавана]