Кіраўнік ЦРУ прылятаў у Маскву, каб папярэдзіць Расію аб недапушчальнасці атакі на краіны Балтыі — Politico
Навіна пра паездку Джона Рэткліфа ў Расію выклікала буру здагадак у свеце, бо гэта была першая вядомая паездка дырэктара ЦРУ ў сталіцу Расіі пры прэзідэнце Дональдзе Трампе. Папярэдні раз кіраўнік ЦРУ прылятаў у Маскву пяць гадоў таму, каб папярэдзіць Крэмль пра недапушчальнасць уварвання ва Украіну. Тады гэта было безвынікова.
Дырэктар ЦРУ Джон Рэткліф на гэтым тыдні таемна наведаў Маскву і папярэдзіў расійскія ўлады аб недапушчальнасці эскалацыі супраць саюзнікаў ЗША па NATO, найперш Эстоніі, Латвіі і Літвы. Пра гэта са спасылкай на дзве крыніцы, знаёмыя з ходам перамоў, паведамляе Politico.
«Сустрэча была ў першую чаргу прысвечаная папярэджанню Расіі супраць любых эскалацыйных дзеянняў у дачыненні да краін Балтыі», — паведаміла адна з крыніц выдання.
Як адзначае Politico, візіт кіраўніка ЦРУ ў расійскую сталіцу адбыўся без папярэдняга абвяшчэння. Гэта першая вядомая паездка кіраўніка амерыканскай разведкі ў Маскву падчас цяперашняга прэзідэнцтва Дональда Трампа.
Пра тое, што Рэткліф падчас паездкі папярэджваў Маскву аб магчымым нападзе на краіны NATO, раней паведаміла і Wall Street Journal. Выданне, аднак, не ўдакладняла, якія менавіта краіны былі галоўнай тэмай размовы. Politico сцвярджае, што асаблівая ўвага была нададзеная Эстоніі, Латвіі і Літве.
Паводле звестак выдання, Рэткліф таксама выкарыстаў паездку для ціску на Маскву з патрабаваннем скараціць ваенную і эканамічную падтрымку Ірана. Ён заклікаў Расію спыніць перадачу Ірану зброі і абаронных тэхналогій.
Візіт адбыўся на фоне ўзмацнення напружанасці паміж Расіяй і краінамі NATO. У апошнія тыдні Масква рабіла шэраг пагроз у адрас дзяржаў альянсу, якія падтрымліваюць Украіну. На Захадзе гэта выклікала асцярогі, што Расія можа ўзмацніць гібрыдныя атакі — дыверсіі і кібератакі — або нават пайсці на абмежаваныя ваенныя дзеянні супраць адной з краін NATO.
Пры гэтым паводле Статута NATO ўзброены напад на аднаго члена альянсу разглядаецца як напад на ўсіх.
Расія, аднак, ужо шмат гадоў выкарыстоўвае супраць заходніх краін метады, якія не дасягаюць парога адкрытай вайны і дазваляюць пазбягаць прамога ваеннага адказу, адзначае Politico.
Сам Дональд Трамп у інтэрв'ю раніцай 26 жніўня адмаўляў, што галоўнай мэтай паездкі Рэткліфа было перакананне Уладзіміра Пуціна не выпрабоўваць NATO на трываласць або не атакаваць Вялікабрытанію. Ён назваў паездку кіраўніка ЦРУ «напаўруціннай», але прызнаў, што яна была звязаная са спробамі спыніць вайну ва Украіне.
«Я ненавіджу расчароўваць людзей. Мы хацелі б убачыць канец вайны ва Украіне», — заявіў Трамп.
Крэмль афіцыйна не раскрываў падрабязнасці візіту. Паводле паведамленняў расійскага боку, Пуцін з Рэткліфам не сустракаўся, а кіраўнік ЦРУ прыязджаў у Расію для кантактаў паміж спецслужбамі.
Цікавая дэталь: вайсковы самалёт C-17, на якім Рэткліф прыляцеў у Маскву, перад гэтым вылецеў з Латвіі, сведчаць адкрытыя дадзеныя адсочвання палётаў.
Politico нагадвае, што гэта ўжо не першы візіт кіраўніка ЦРУ ў Маскву напярэдадні сур'ёзнай эскалацыі.
У лістападзе 2021 года тагачасны дырэктар ЦРУ Уільям Бёрнс прыязджаў у расійскую сталіцу, каб папярэдзіць Пуціна супраць поўнамаштабнага ўварвання ва Украіну. Праз тры месяцы Расія пачала вайну.
Цяперашні візіт Рэткліфа адбываецца ў момант, калі расійска-ўкраінская вайна не набліжаецца да завяршэння, а Масква і Кіеў узмацняюць далёкія ўдары дронамі і ракетамі. Адначасова, як паведамляе Politico, Трамп усё больш расчароўваецца ў Пуціне, паколькі яму не ўдаецца выканаць абяцанне хутка спыніць вайну.
Цяпер чытаюць
Былы палітвязень знайшоў у Вільні падпрацоўку ў чаце — і трапіў пад крыміналку за правакацыі супраць Украіны30
Каментары
))))