Праз атакі беспілотнікаў закрываліся аэрапорты Масквы. Памяняўся і расклад рэйсаў з Мінска
У другой палове дня 23 кастрычніка ў чатырох маскоўскіх аэрапортах — Шарамецева, Дамадзедава, Унукава і Жукоўскім — увялі часовыя абмежаванні на вылет і прылёт самалётаў праз атаку беспілотнікаў. Пра гэта паведаміла расійскае Федэральнае агенцтва паветранага транспарту.
Прыкладна а 15‑й гадзіне з'явіліся паведамленні пра поўнае закрыццё паветранай прасторы над Масквой. У аэрапорце Шарамецева абвясцілі паветраную трывогу і пачалі эвакуацыю.
Аэрапорт Пулкава ў Санкт-Пецярбургу прыняў 25 рэйсаў, якія павінны былі прызямліцца ў Маскве. Паведамлялася таксама, што самалёт, які ляцеў з Пекіна, перанакіравалі ў Мінск.
Праблемы з пасадкай узніклі і ў рэйса Airbus A380 кампаніі Emirates, які выконваў пералёт з Дубая ў Маскву. Найбуйнейшы ў свеце пасажырскі самалёт некаторы час кружыў над Пензенскай вобласцю ў чаканні магчымасці прызямліцца. Паводле паведамленняў расійскіх СМІ, гэты тып самалётаў могуць прымаць толькі некалькі аэрапортаў Расіі.
Адзін з самалётаў Belavia таксама некаторы час кружыў над Масквой, пасля чаго вярнуўся ў Мінск.
Бліжэй да 17‑й гадзіны маскоўскія аэрапорты пачалі зноў прымаць рэйсы. Аднак абмежаванні ўжо паўплывалі на расклад палётаў з Нацыянальнага аэрапорта Мінск.
Вячэрні рэйс расійскай авіякампаніі «Пабеда» ва Унукава, запланаваны на 21:00, адмянілі. Іншыя рэйсы ў Маскву перанеслі на пазнейшы час. Так, вылет «Аэрафлота» ў Шарамецева замест 17:20 запланавалі на 18:50, а рэйс Belavia ў той жа аэрапорт затрымалі з 19:55 да 20:55.
Таксама адклалі дзённыя рэйсы Belavia ва Унукава і «Аэрафлота» ў Шарамецева, пасажыраў якіх ужо аформілі на пасадку.
Змяняецца расклад і на іншых напрамках, маршруты якіх праходзяць над тэрыторыяй Расіі. Напрыклад, рэйсы ў турэцкую Анталію затрымліваюцца на пяць-шэсць гадзін.
Генеральны дырэктар Belavia Ігар Чаргінец раней тлумачыў, што закрыццё паветранай прасторы і абмежаванні ў замежных аэрапортах павялічваюць выдаткі авіякампаніі. З-за змены маршрутаў павялічваецца час палётаў і расход паліва, а колькасць рэйсаў, якія самалёты могуць выканаць, скарачаецца. Абмежаванні ў расійскіх аэрапортах таксама прымушаюць карэктаваць расклад міжнародных палётаў.
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу5
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары