Praz ataki bieśpiłotnikaŭ zakryvalisia aeraporty Maskvy. Pamianiaŭsia i raskład rejsaŭ ź Minska
U druhoj pałovie dnia 23 kastryčnika ŭ čatyroch maskoŭskich aeraportach — Šaramiecieva, Damadziedava, Unukava i Žukoŭskim — uviali časovyja abmiežavańni na vylet i prylot samalotaŭ praz ataku bieśpiłotnikaŭ. Pra heta paviedamiła rasijskaje Fiederalnaje ahienctva pavietranaha transpartu.
Prykładna a 15‑j hadzinie źjavilisia paviedamleńni pra poŭnaje zakryćcio pavietranaj prastory nad Maskvoj. U aeraporcie Šaramiecieva abviaścili pavietranuju tryvohu i pačali evakuacyju.
Aeraport Pułkava ŭ Sankt-Pieciarburhu pryniaŭ 25 rejsaŭ, jakija pavinny byli pryziamlicca ŭ Maskvie. Paviedamlałasia taksama, što samalot, jaki lacieŭ ź Piekina, pieranakiravali ŭ Minsk.
Prablemy z pasadkaj uźnikli i ŭ rejsa Airbus A380 kampanii Emirates, jaki vykonvaŭ pieralot z Dubaja ŭ Maskvu. Najbujniejšy ŭ śviecie pasažyrski samalot niekatory čas kružyŭ nad Pienzienskaj vobłaściu ŭ čakańni mahčymaści pryziamlicca. Pavodle paviedamleńniaŭ rasijskich ŚMI, hety typ samalotaŭ mohuć prymać tolki niekalki aeraportaŭ Rasii.
Adzin z samalotaŭ Belavia taksama niekatory čas kružyŭ nad Maskvoj, paśla čaho viarnuŭsia ŭ Minsk.
Bližej da 17‑j hadziny maskoŭskija aeraporty pačali znoŭ prymać rejsy. Adnak abmiežavańni ŭžo paŭpłyvali na raskład palotaŭ z Nacyjanalnaha aeraporta Minsk.
Viačerni rejs rasijskaj avijakampanii «Pabieda» va Unukava, zapłanavany na 21:00, admianili. Inšyja rejsy ŭ Maskvu pieranieśli na paźniejšy čas. Tak, vylet «Aerafłota» ŭ Šaramiecieva zamiest 17:20 zapłanavali na 18:50, a rejs Belavia ŭ toj ža aeraport zatrymali z 19:55 da 20:55.
Taksama adkłali dzionnyja rejsy Belavia va Unukava i «Aerafłota» ŭ Šaramiecieva, pasažyraŭ jakich užo aformili na pasadku.
Źmianiajecca raskład i na inšych napramkach, maršruty jakich prachodziać nad terytoryjaj Rasii. Naprykład, rejsy ŭ tureckuju Antaliju zatrymlivajucca na piać-šeść hadzin.
Hienieralny dyrektar Belavia Ihar Čarhiniec raniej tłumačyŭ, što zakryćcio pavietranaj prastory i abmiežavańni ŭ zamiežnych aeraportach pavialičvajuć vydatki avijakampanii. Z-za źmieny maršrutaŭ pavialičvajecca čas palotaŭ i raschod paliva, a kolkaść rejsaŭ, jakija samaloty mohuć vykanać, skaračajecca. Abmiežavańni ŭ rasijskich aeraportach taksama prymušajuć karektavać raskład mižnarodnych palotaŭ.
Ciapier čytajuć
KDB zapuściŭ novy bot u telehramie dla viarboŭki biełarusaŭ za miažoj. Prapanujuć rasklejvać ulotki, fatahrafavać abjekty i «niešta inšaje»9
Kamientary