Мой асабісты штат Айдаха
Фільм "Мой асабісты штат Айдаха" Гаса Ван Сэнта. Займае пачэснае месца ў сотні фільмаў, якія варта пабачыць.
Мой асабісты штат Айдаха (My Own Private Idaho)
ЗША, 1991, каляровы, 102 хв.
Рэжысэр: Гас Ван Сэнт
Ролі выконваюць: Рывэр Фэнікс, Кіану Рыўз, К’яра Казэлі, Уда Кір, Джэймз Русо, Ўільям Рычард, Родні Гарві, Майкл Паркер
Жанр: Драма
Адзнака: 9,5 (з 10)
Два хлопцы-палюбоўнікі, якія падпрацоўваюць прастытуцыяй, без усялякае мэты вандруюць па зямлі. Адзін зь іх (Рывэр Фэнікс) – бяздомны, які хварэе на раптоўныя сьненьні й згубу прытомнасьці, другі (Кіану Рыўз) – сын багатага бацькі, уцёк з дому на знак пратэсту. Неўзабаве бунт завершыцца, але закаханы сябар пра гэта ня ведае.
Рэжысэр Гас Ван Сэнт распачынаў кар’еру, як прадусар тэлерэклямы, адылі працаваў на студыі “масавіка” Роджэра Кормэна. У стужках Ван Сэнта тэлевізійная кліпавасьць закідвае ў наркафантазіі й залімітныя станы (“Аптэчны каўбой”), выкшталцоная форма грае з бульварным сюжэтам (“Памерці за…”), а ў культуровае падсьвядомасьці стаіліся аднаполыя жарсьці (“Благая ноч”).
“Мой асабісты штат Айдаха” – лірычны шэдэўр Гаса Ван Сэнта, дзе ў сьненьнях лётаюць паветраныя дамы, юнакі з порнавокладак, не сыходзячы з бачынаў – дзеляцца ўражаньнямі, а ў спрэчкі герояў уплеценыя шэксьпіраўскія пярэбрахі Фальстафа й прынца Генры. Айдаха, Рым, Сыэтл, эўрапейскі enfant terrible Уда Кір, хаўтуры бацькоў ("статуснага" й бадзяжнага) – каляж імгненьняў паміж наркалептычнымі адключкамі й сполахі разьвітаньня.
Замест постмадэрновай іроніі – элегічны сум. Замест бульварнай гісторыі – трагедыя экзыстэнцыйнага вандраваньня ў форме мас-мэдыйнага пастышу. (У фільме "Джэры" вандроўка набудзе арт-гаўзны выгляд.) Ёсьць неба, ёсьць зямля, ёсьць беспрытульныя душы, агорнутыя самотай, ёсьць сьвятло начнога вогнішча й пекната дарогі пад навіслымі аблокамі.
Рывэр Фэнікс і Кіану Рыўз граюць надрыўна і з залімітнаю шчырасьцю. Для абодвух фільм стаўся прарочым. Пасьля стужкі Кіану Рыўз узмацніў свой статус галівудзкага "сына”, а кінуты Рывэр Фэнікс памёр ад перадазіроўкі наркотыкаў.
Здзелка Трампа з Пуціным: чым за яе могуць заплаціць Украіна і Беларусь19
Здзелка Трампа з Пуціным: чым за яе могуць заплаціць Украіна і Беларусь
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі77
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі7
«Запрасіў мяне на спатканне і прыехаў на яго з пакетам памідораў замест кветак». Што ўспамінаюць пра Яна Памедора Рэуцкага, адміна шматтысячнай суполкі беларусаў Польшчы77
Каментары