Мэлядрама і антыглябаліская драма.
АНТ, 17.55
Знахар (Znachor)
Польшча, 1982, каляровы, 128 хв.
Рэжысэр: Ежы Гофман
Ролі выконваюць: Ежы Бінчыцкі, Артур Барчыш, Ганна Дымна, Анджэй Капічынскі, Генавефа Корска, Томаш Стокінгер
Жанр: Мэлядрама паводле раману Тадэвуша Даленгі-Мастовіча
Адзнака: 6,5 (з 10)
Ад знакамітага хірурга Рафала Вілчура (Ежы Бінчыцкі) сышла жонка й забрала маленькую дачку. А злодзеі рабуюць хірурга й жорстка яго зьбіваюць: цяпер ён анічога ня памятае. Герой бадзяецца па вёскам – і трапляе да багатага млынара. У млынара сын-калека – і герой яго лекуе.
Слава пра знахара хутка разыходзіцца, але будуць новыя выпрабаваньні…
Карціна Ежы Гофмана – найузорнейшая мэлядрама: няшчасьці, сьлёзы, разьбітая сям’я, згубленая памяць, знойдзеная дачка – і радасьць напрыканцы. Жанр падкрэсьліваецца ўзьвінчанаю акторскай гульнёй – але й гэта й падабаецца. І даходзіць да кожнага. Фільм вельмі пасуе для сямейнага прагляду.
Адзін з сама ўдалых чульлівых фільмаў.
СТВ, 23.25
Выхавальнікі (Die fetten Jahre sind vorbei / Edukators)
Нямеччына – Аўстрыя, 2004, каляровы, 127 хв.
Рэжысэр: Ханс Вайнгартэн
Ролі выконваюць: Даніэль Бруль, Юлія Енч, Штыпе Эрцэг, Бургхард Клаўснэр
Жанр: Сацыяльна-палітычная драма
Тройца бунтаўнікоў-антыглябалістаў забіраецца ў кватэры бюргераў – і перастаўляе там рэчы, пратэстуючы такім чынам супраць спажывецкага грамадзтва. Падчас адной з такіх апэрацый на сцэне нечакана зьяўляецца гаспадар, былы гіпі…
Студэнцкія паўстаньні 60-ых завершыліся зьдзейсьненай сэксуальнай рэвалюцыяй – і новым дабрабытам. Былыя рэвалюцыянэры самі сталіся “сытай буржуазіяй”, і цяпер іхнія дзеткі граюць у “паўстанцаў”.
Фільм для антыглябалістаў і аматараў “Летуценьнікаў” Бэрталючы.
Карціна была прадстаўленая на Канскім фэсьце.
Каментары