Ячэджан — хрумсткія карэйскія бліны з гароднінай, якія падымуць вам настрой 

Пакаштуйце ўсяго кавалачак, і вы зразумееце, чаму многія карэйцы пякуць гэтыя пікантныя бліны, калі дрэннае надвор'е ці калі проста трэба палепшыць настрой.

13.05.2023 / 07:43

Карэйскія бліны з гароднінай. Фота: lookcatchu.com

На карэйскай мове yachae абазначае гародніна, а jeon — бліны. Каб прыгатаваць карэйскія бліны з гароднінай, вам спатрэбіцца:

• 1 шклянка кабачка, парэзанага сярэдняй саломкай,
• 1 шклянка морквы, таксама парэзанай сярэдняй саломкай,
• 2 шклянкі нашаткаванай зялёнай капусты,
• палова маленькай нарэзанай жоўтай цыбуліны,
• 7 пёраў зялёнай цыбулі, нарэзаных палоскамі каля 4 см.

Для цеста:

• 1 шклянка мукі,
• палова шклянкі кукурузнага ці бульбянога крухмалу,
• 1 чайная лыжка разрыхляльніку,
• палова чайнай лыжкі солі,
• 1,5 шклянкі халоднай вады (можа спатрэбіцца менш).

Дадаткі:

• соевы соус,
• кунжут.

Як гатаваць:

1. Змяшайце сухія інгрэдыенты для цеста. Паступова дадавайце халодную ваду, пакуль сумесь не стане такой кансістэнцыі, як цеста для бліноў.
2. Дадайце нарэзаную гародніну ў цеста і добра перамяшайце.
3. На патэльню з антыпрыгарным пакрыццём налівайце алей, пакуль ён не пакрые ўсё дно. Выкладзіце 1,5 шклянкі цеста на патэльню і размяркуеце яго тонкім пластом. Гатуйце 4—5 хвілін або да залацістага, хрумсткага карычневага колеру.
4. Перавярніце і дадайце 1 сталовую лыжку алею па краі бліна. Хай смажыцца яшчэ 3—4 хвіліны або да залацістага, хрумсткага карычневага колеру. Перавярніце яшчэ раз і дайце абсмажыцца на працягу 1 хвіліны. Перакладзіце блін на талерку для астывання.
5. Разрэжце блін на дзевяць частак, падавайце з падліўкай з соевага соусу і атрымлівайце асалоду!

Парады:

• Цеста павінна быць даволі густым, таму залішне не перамешвайце, каб яно не атрымалася занадта мягкім.
• Абавязкова выкарыстоўвайце халодную ваду, каб цеста заставалася як мага больш халодным, і хутка пачынайце гатаванне бліноў. Гэта дапаможа атрымаць лепшую тэкстуру. Вы таксама можаце прыгатаваць цеста загадзя і астудзіць яго ў халадзільніку да выкарыстання.
• Блін павінен атрымацца хрумсткі звонку і мяккі ўнутры. Для ідэальнай хрумсткай тэкстуры выкарыстоўвайце шмат алею. У адваротным выпадку бліны будуць больш мяккія — што таксама нядрэнна, калі падаваць іх маленькім дзецям.
• Не пераварочвайце блін занадта рана. Пачакайце, пакуль ніз не стане залацістым і храбусткім.
• Замест прапанаванай гародніны можна ўжыць і іншую. Гэта можа быць брокалі, квяцістая капуста, балгарскі перац, гарох, кукуруза, а таксама бульба, грыбы і морапрадукты (крэветкі і кальмары). Пры жаданні можна дадаць і яечны бялок.
• Калі выкарыстоўваеце здробненую гародніну, адцісніце з яе як мага больш соку.

Больш рэцэптаў:

Рэцэпт на выхадныя. Англійскія аладкі піклеты — новы варыянт смачнага сняданка

Рэцэпт на выхадныя. Аладкі з бананам і беконам — цікавае спалучэнне

Латкес: як яўрэйская страва запазычыла назву ад беларускіх аладак. І нашмат даўжэйшая гісторыя

Nashaniva.com