У амбасадзе Венесуэлы ў Мінску сёння адбываюцца жалобныя мерапрыемствы ў сувязі з смерцю прэзідэнта Уга Чавеса.
У амбасадзе Венесуэлы ў Мінску сёння адбываюцца жалобныя мерапрыемствы ў сувязі з смерцю прэзідэнта Уга Чавеса.
Каля амбасады дзяжурыць міліцыянты, таксама прысутнічаюць асобы ў цывільным.
Зранку да амбасады прыйшла дэлегацыя БРСМ. Яны прынеслі кветкі і запалілі лампадкі.
Рэктар Акадэміі кіравання пры прэзідэнце Анатоль Маразевіч прыехаў у амбасаду, каб выказаць свае спачуванні.
Праз некаторы час прыбыла армянская дэлегацыя.
Амбасадар Арменіі Армэн Хачатран.
У холе амбасады Венесуэлы.
Армэн Хачатран першым пакінуў спачуванні.
Адна з тэлекамер выпадкова ўпала на партрэт Уга Чавеса.
Мастак прынёс афорт «Заклік князя».
Члены «Белай Русі» на шляху ў амбасаду.
Ля венесуэльскай амбасады прыбіраюць снег. Пад грукат бульдозераў збіраюцца венесуэльцы. Размаўляць з журналістамі ім не хочацца: на ўсялякі выпадак яны кажуць журналістам «Калі што, мы вас знойдзем».
Ля плота ружы і свечкі — першымі на жалобную цырымонію прыгналі БРСМаўцаў са сцягамі БРСМ і партрэтам Уга Чавэса. Яны амаль адразу рассосваюцца ў розныя бакі. Ля амбасады засталіся журналісты, якія чакаюць адкрыцця цырымоніі: у амбасадзе прапануюць пакінуць спачуванні ў адмысловай кнізе.
Цырымонія затрымліваецца. Супрацоўніца амбасады частуе прамёрзлых у чаканні журналістаў кавай. Нешматлікія венесуэльцы стаяць адасоблена, бачна, што яны насамрэч перажываюць страту.
Першым развітацца з Чавэсам прыехаў рэктар Акадэміі кіравання пры прэзідэнце Анатоль Маразевіч, які ля брамы амбасады выступае з прамовай.
«Мы вельмі спачуваем народу Венесуэлы, з якім паспелі парадніцца. — кажа ён. — Уга Чавэс зрабіў шмат і для Беларусі. Мы спадзяемся, што на выбарах народ Венесуэлы зробіць правільны выбар, і краіна будзе развівацца так, як гэта было пры Чавэсу».
Паступова людзей запускаюць у амбасаду — адразу на ўваходзе стаіць невялікі партрэт Чавэса, свечка, над імі вісіць батальнае палатно на баліварыянскую тэматыку. Супрацоўніца амбасады, якая кіруе цырымоніяй, увесь час выцірае слёзы.
«Мы вельмі любілі нашага прэзідэнта. — кажа яна. — Мы думаем, шмат хто прыйдзе пакінуць свае спачуванні: вось БРСМ ужо прыходзіў, цяпер журналісты».
Пакой, дзе ляжыць кніга, аформлены сціпла — некалькі партрэтаў Балівара, вялізны партрэт Чавэса, замест жалобнай стужачкі — венесуэльскі сцяг. Чарга з тых, хто прыйшоў пакінуць спачуванні, невялікая — большасць дэлегацый чакаецца цягам дня. Першым свае спачуванні пакідае амбасадар Арменіі Армэн Хачатран - ён прыехаў на цырымонію адразу пасля Маразевіча.
На выхадзе з амбасады стаіць мужчына сталага ўзросту з вялікай тэчкай, побач з ім два чалавекі ў цывільным.
На тэчцы напісана імя адрасата «Паслу Венесуэлы Дыасу Нуньесу», а таксама «Афорт „Прызыў князя“». Мастака ў амбасаду не пускаюць, і нават не даюць журналістам з ім паразмаўляць.
«Я ўжо не першы раз перадаю ім карціны. — кажа мужчына, але раскрыць тэчку яму не даюць».
«Вы з якой газеты? „Наша Ніва“? Чуў пра такую?» — пытаецца адзін з «цывільных». — «Я не чуў, пасля дзеда адловіце».
Тым часам у амбасаду заходзяць венесуэльцы, а таксама дэлегацыя «Белай Русі» — усе ў «фірмовых» шаліках.
На вачах венесуэльцаў — ад ахоўнікаў да вайскоўцаў — слёзы.
