Скандальна вядомы расійскі акцёр Аляксей Панін выказаў свае меркаванні наконт таго, што адбываецца ва Украіне, а таксама расказаў пра сваё стаўленні да украінцаў.
«Крым заўсёды быў рускім. Яго жыхары заўжды адчувалі сябе расіянамі… Адэсіты ніколі не адчувалі сябе украінцамі», — расказвае пра свае візіты ў Крым і Адэсу Панін.
Таксама расійскі акцёр расказаў пра сваё ўспрыманне насельніцтва суседняй з Расіяй дзяржавы: «Украінцы — вельмі добрая нацыя, але, на жаль, вельмі дурная. Так запудрыць мазгі можна толькі папуасам з племені Новая Гвінея. Ім нібыта каралікі паказалі, і яны бягуць за гэтымі каралікамі. Яны дурныя. Гэтым карыстаюцца амерыканцы — хто заўгодна. Парашэнка той жа самы».
Далей, як кажуць, «Астапа панесла», і ён вырашыў звярнуцца персанальна да прэзідэнта Украіны Пятра Парашэнкі: «Спадар Парашэнка, гэта ўжо нават не справа сумлення. Я нават не заклікаю да вашага сумлення — у вас яго няма. Вы не тое што несумленны чалавек, вы — жывёла. Я з вялікім задавальненнем сваімі рукамі перарэзаў бы вам горла».
У сваім маналогу акцёр прыгадвае нейкія расійскія прапагандысцкія штампы накшталт забітых дзяцей «недзе ў Данецку ці Луганску», а таксама адарваныя рукі людзей і знішчаныя дамы.
«Як жа хочацца, каб рускія войскі сапраўды ўвайшлі да вас туды. Як жа мне хочацца пабачыць Львоў у агні», — працягвае свой зварот да прэзідэнта Украіны Панін.
Завяршаецца відэа проста феерычнай развязкай, якой не чакаў бы, пэўна, нават сам Квенцін Таранціна: «Я хачу пажадаць усім дабра! Будзьце добрымі!»
