12-гадовая Ніколь Бар з графства Эсэкс у Англіі атрымала ў тэсце IQ вынік 162. Гэта на два пункты больш за вынік Альберта Эйнштэйна і Стывена Хокінга, перадае газета Mirror.
mirror.co.uk
Дзяўчынка здала тэст разам са сваім бацькам, які спадзяваўся трапіць у таварыства Мэнса — арганізацыю для найразумнейшых людзей свету. Праўда, Ніколь прайшла тэст нашмат лепш за тату і атрымала максімальны бал — 162.
Ніколь, па словах бацькоў, вельмі шмат часу надае вучобе, займаецца ў тэатральным гуртку, а сваё жыццё плануе прысвяціць медыцыне. У школе дзяўчынка прыкметна абагнала аднагодкаў у матэматычных ведах і асвоіла комплексныя лікі яшчэ да таго, як стала падлеткам.
У методыцы, па якой быў разлічаны інтэлект Ніколь, вынік у 140 пунктаў прызнаецца як «геніяльнасць». 161 бал лічыцца максімальным для дарослага чалавека. Альберт Эйнштэйн і Стывен Хокінг у гэтым тэсце атрымалі па 160 балаў.