Вярхоўная Рада ў першым чытанні пагадзілася ўнесці змены ў Канстытуцыю па дэцэнтралізацыі ўлады. За гэта прагаласавалі 265 дэпутатаў.
Адразу пасля гэтага спікер Уладзімір Гройсман закрыў пасяджэнне.
Перад галасаваннем і ў яго працэсе частка дэпутатаў, у прыватнасці — ад Радыкальнай партыі, блакавалі трыбуну, стукалі пустымі пластыкавымі бутэлькамі, крычалі «ганьба!» і ўключалі сірэну. Прадстаўнік фракцыі Юрый Шухевіч заяўляў, што ў гэтым пытанні Украіне здраджвае Еўропа, як калісьці яна здрадзіла Чэхаславакіі перад Гітлерам, а таксама двойчы працытаваў думкі Уладзіміра Леніна за рабоў.
Таксама супраць гэтых зменаў выступала вялікая частка фракцыі «Самапомач». Яе старшыня Алег Беразюк падчас выступу заявіў, што гаворка ідзе пра «здраду Украіне».
Праціўнікі прыняцця гэтых змен настойвалі, што яны дадуць занадта шырокія правы акупаваным раёнам Данбаса.
У сваю чаргу на прыняцці гэтых змяненняў настойваў старшыня Вярхоўнай Рады Уладзімір Гройсман. Ён сцвярджаў, што ніякіх асаблівых правоў ні Данбас, ніводны іншы рэгіён не атрымае, але мясцовыя грамады змогуць лепш распараджацца сваімі рэсурсамі.
Гэты закон таксама падтрымала фракцыя «Апазіцыйнага блока», старшыня якой Юры Бойка заявіў, што дакумент адкрые шлях да ўрэгулявання сітуацыі на ўсходзе.
Каментары