Народны артыст Беларусі, вядомы кампазітар Эдуард Ханок вырашыў не падаваць у суд на Ядвігу Паплаўскую і Анатоля Ярмоленку.
Фота: sputnik.by
— Ніякіх судоў не будзе! — цвёрда сказаў Эдуард Сямёнавіч «Беларускаму партызану». — Я якраз сёння сустракаўся з адвакатам і ён патлумачыў, што нашы суды яшчэ проста не гатовыя разглядаць падобныя справы. Як грамадзянін Расіі я мог бы звярнуцца ў расійскі суд, але, як патлумачыў мне адвакат, пазовы прымаюць па месцы жыхарства адказчыка.
Уся гэтая сітуацыя і каментары некаторых артыстаў вельмі нагадваюць мне скандал з ружовай кофтачкай і Філіпам Кіркоравым. Сутнасць простая: людзі, набіраючы папулярнасць, пачынаюць хаміць і працаваць на публіку, як цяпер гэта робіць спадарыня Паплаўская.
Не я вінаваты ў тым, што здарылася. Яна сама сабе перакрыла кісларод. Калі б яна прапанавала яшчэ раз спакойна, без істэрык абмеркаваць гэтую сітуацыю, я ўпэўнены, што мы выпілі бы па філіжанцы гарбаты і знайшлі б агульную мову. А тое, што адбываецца сёння …
Адным словам, у суд я дакладна не пайду. Але забарону на выкарыстанне сваёй музыкі не здымаю. А будуць парушаць - будзем разбірацца.
Многія папракаюць мяне, што, маўляў, я задумаў увесь гэты скандал з-за грошай. Але я даволі забяспечаны чалавек. І калі б артысты мне заплацілі нейкія грошы, то я не прысвоіў б іх сабе, а пералічыў бы дзецям, хворым на анкалогію. Пытанне было не ў грашах.
Я рады, што падняў пытанне з парушэннем маіх аўтарскіх правоў, што яно выклікала вялізны рэзананс. Многія артысты тэлефануюць і падтрымліваюць мяне. Спадзяюся, гэта дапаможа ўдасканаліць наша заканадаўства ў гэтай сферы.
