У пятніцу ў пасольстве ЗША адбылася дзьвюхгадзінная сустрэча памочніка дзяржаўнага сакратара ЗША Дэвіда Мэркеля з прадстаўнікамі апазыцыі. На сустрэчы прысутнічалі лідэры АДС Анатоль Лябедзька, Вінцук Вячорка, Сяргей Калякін, былы палітвязень Аляксандар Казулін, намесьнік старшыні Руху «За свабода» Віктар Карняенка, старшыня БАЖ Жанна Літвіна, правааборанца Алесь Бяляцкі і іншыя.
Дэвіда Мэркель раптоўна прыляцеў у Менск учора пасьля абеду. Візыт стаў магчымы пасьля вызваленьня з турмаў краіны ўсіх палітвязьняў. «Гэта адкрывае рэальную магчымасьць для значнага паляпшэньня адносінаў паміж ЗША і Беларусьсю», — гаварылася ў заяве прэс‑сакратара Дзярждэпу Робэрта Вуда.
Адразу па прыезьдзе Дэвід Мэркел меў сустрэчу зь міністра замежных спраў Сяргеем Мартынавым. Як паведамляюць афіцыйныя крыніцы, на сустрэчы быў дэталёва разгледжаны ўвесь спэктар беларуска‑амэрыканскіх адносін. Субяседнікі абмеркавалі таксама шляхі паляпшэньня гэтых адносін.
Віктар Карняенка кажа, што галоўнымі пытаньнямі сустрэчы ў пятніцу былі тэмы палітвязьняў і будучых парлямэнцкіх выбараў. «Калі ў першым пытаньні і мы, і дыпляматы бачым канкрэтныя зрухі, то адносна выбараў застаецца яшчэ шмат няяснасьці. Мы расказалі пра цэлы шэраг парушэньняў і ўціску на актывістаў, што папярэднічаюць выбарчай кампаніі. У прыватнасьці было паведамлена пра мінімальны працэнт апазыцыі ва ўчастковых выбарчых камісіях», — кажа В.Карняенка.
На сустрэчы зь беларускай апазыцыяй Мэркел паведаміў, што
ягоны візыт адбыўся пасьля асабістага распараджэньня дзяржсакратара ЗША Кандалізы Райз, і яго можна ацэньваць, як гатоўнасьць ЗША да разьвіцьця далейшага дыялёгу.
Лідэр АГП Анатоль Лябедзька разглядае сустрэчу са сп.Мэркелем як высокага ўзроўню, так і досыць зьмястоўную. «Прадстаўнік Белага Дому зазначыў, што
пытаньне прызнаньня легітымнасьці выбараў не залежыць ад удзелу, ці няўдзелу апазыцыіў гэтай кампаніі. Для нас гэта вельмі важна, бо адпавядае нашым поглядам», — дзеліцца А.Лябедзька.
Што ж атрымаюць улады, калі парлямэнцкія выбары пройдуць па адносна дэмакратычным сцэнары? «Гаворыцца пра стратэгію роўнасьці і адэкватнасьці крокаў. У выпадку дэмакратычных выбараў, думаю, Амэрыка будзе гатовая да скасаваньня эканамічных ці палітычных санкцый супраць Беларусі, але канкрэтна пра гэта гаворка пакуль не вялася», — зазначае старшыня АГП.
«Думаю, што мэтай гэтага візыту было дэманстраваньне таго, што Амэрыка бачыць пэрспэктывы ў разьвіцьці адносінаў зь Беларусьсю», — кажа В.Карняенка.
Не зьмянілася пазыцыя ЗША і адносна таго, што магчымыя
перамовы павінны быць трохбаковымі, з удзелам апазыцыі, зазначае А.Лябедзька.
Сёньня Дэвід Мэркел правядзе яшчэ шэраг сустрэчаў у Адміністрацыі прэзыдэнта і Цэнтравыбаркаме. Пасьля чаго ён накіруецца ў Вашынгтон.
Візыт Дэвіда Мэркела пакуль не дае канкрэтных адказаў на асноўныя беларуска‑амэрыканскія праблемы, як санкцыі супраць «Белнафтахіму», вяртаньне дыпляматаў ці адмена забароны беларускім чыноўнікам уяжджаць на тэрыторыю ЗША. Таму місія Мэркела выглядае больш падобнай на пробны шар. Спроба глянуць да якой ступені гатовая дэмакратызавацца ўлада. Наступны іспыт — парлямэнцкія выбары.
