КДБ заяўляе, што не мае адносін да прыгод польскага дыпламата ў Мінску 13

Камітэт дзяржаўнай бяспекі Беларусі не мае адносін да прыгод «п’янага польскага дыпламата ў Мінску». Аб гэтым карэспандэнту БЕЛТА заявіў намеснік начальніка цэнтра інфармацыі і грамадскіх сувязей КДБ Артур Стрэх, каментуючы інфармацыю, якая з’явілася на сайце польскага выдання «Gazeta Wyborcza» аб нібыта спробе беларускіх спецслужбаў дыскрэдытаваць супрацоўніка палітычнага аддзела пасольства Польшчы Вітольда Місяка.

Сайт газеты «Gazeta Wyborcza» прыводзіць словы прэс-сакратара МЗС Польшчы аб тым, што размешчаны невядомымі ў Інтэрнэце ролік з п’яным польскім дыпламатам праўдзівы, але яго апісанне змяшчае хлусню. Вітольд Місяк, які адказвае за пытанні бяспекі дыпмісіі, 13 снежня адпачываў у мінскім кафэ з дыпламатамі розных краін. На відэа з камеры нагляду відаць, што пасля 23.00 ён устае з-за століка, хістаецца, ляціць на другі столік і падае. Яго паднімаюць яго калегі і п’янага выводзяць на вуліцу. У далейшым Місяк пацвердзіў, што на відэазапісе сапраўды ён, але сцвярджаў, што яму нешта падсыпалі ў бакал, што і прывяло да страты каардынацыі.

У тытрах да відэа паведамляецца, што польскі дыпламат пабіўся, страціў службовыя дакументы і прызначаны для сакрэтных перагавораў сотавы тэлефон маркі Blackberry. Прадстаўнік польскага МЗС М.Басацкі гэты факт абвергнуў.

«Гісторыя з выпіўшым польскім дыпламатам стала шырока вядома выключна дзякуючы відэа на YouTube.

Выпіў чалавек лішняга, няхай нават дыпламат… Што тут дзіўнага? Спробы ж польскіх улад абвінаваціць у гэтым беларускія спецслужбы выклікаюць недаўменне»,

 — рэзюмаваў Артур Стрэх.

Пасля з’яўлення відэа ў Інтэрнэце міністр замежных спраў Польшчы Радаслаў Сікорскі прыняў рашэнне аб адклiканнi Вітольда Місяка ў Варшаву.

БелТА

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ