Сын Гайдукевіча з міліцэйскага начальніка стаў намеснікам таты ў партыі 24

Намеснікам старшыні Ліберальна-дэмакратычнай партыі (ЛДП) 5 верасня на пасяджэнні вышэйшага савета арганізацыі абраны былы начальнік Фрунзенскага РУУС Алег Гайдукевіч, сын лідара партыі Сяргея Гайдукевіча.

«Гэта свядомы крок, — заявіў Алег Гайдукевіч, які ўзначальваў РУУС з 2009 года. — Я прыняў такое рашэнне асабіста сам, ніхто мяне не выганяў. Я даўно ўжо хацеў заняцца палітыкай.

Прыйшоў час, мяне людзі выбралі, я рады, што мне даверылі такую ​​пасаду. Буду працаваць на карысць самай буйной партыі краіны».

Сяргей Гайдукевіч паведаміў, што не можа прымаць нейкія рашэнні за сына. «Ён прыняў для сябе рашэнне. Для мяне ён шараговы член партыі, па-іншаму і быць не можа», — сказаў палітык.

«Алег быў самым адкрытым міліцыянтам у МУС. Ён жа — міліцыянт чысты, ён займаўся міліцэйскімі справамі, на самай справе лавіў злачынцаў», — дадаў Сяргей Гайдукевіч.

5 верасня ў ЛДП таксама былі прынятыя і прызначаны на пасаду: памочнікам старшыні ЛДП — Аляксандр Радкевіч, які раней займаў пасаду першага намесніка генеральнага дырэктара ДА «Белрэсурсы»;

начальнікам галоўнага эканамічнага ўпраўлення ЛДП — Аляксандр Дармель, былы начальнік АБЭЗ Першамайскага раёна Мінска;

начальнікам галоўнага ўпраўлення кадравай палітыкі — Міхаіл Шэлег; начальнікам галоўнага ўпраўлення па агульных пытаннях — Алег Чэсалаў.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ