Запазычанасць беларусаў па крэдытах павялічваецца
Нацыянальны банк паведаміў, што запазычанасць беларусаў па крэдытах да пачатку чэрвеня дасягнула адзнакі ў 17 мільярдаў 900,4 мільёна рублёў. Гэта на 346,2 мільёна рублёў больш у параўнанні з папярэднім месяцам.
Фота: vecteezy.com
Агульны аб'ём запазычанасці насельніцтва па банкаўскіх пазыках працягвае расці ўжо на працягу дванаццаці месяцаў запар. У гэтую суму ўключаныя спажывецкія крэдыты, крэдыты на нерухомасць, аўтакрэдыты і карты растэрміноўкі.
Напрыклад, запазычанасць у крэдытах на нерухомасць у маі павялічылася на 123,3 мільёна рублёў. На пачатак чэрвеня яна складала 12 мільярдаў 300,2 мільёна рублёў. Агульная запазычанасць па пазыках на нерухомасць расце ў тым ліку апошнія некалькі гадоў.
Таксама ў маі выраслі даўгі па спажывецкіх крэдытах — да 5 мільярдаў 541,6 мільёна рублёў. Гэта на 224,2 мільёна рублёў больш, чым у мінулым месяцы.
У гэтым годзе банкі зніжаюць працэнтныя стаўкі на многія віды крэдытаў. Гэта тычыцца крэдытаў, прывязаных да стаўкі рэфінансавання.
Чытайце таксама:
Крэдыты на жыллё сталі таннейшымі. Вось што цяпер прапануюць
Яшчэ адзін банк уводзіць вялізную камісію за абслугоўванне рахункаў у далярах і еўра