Вызваленыя палітвязні прыедуць з Украіны ў Варшаву гэтай ноччу ці раніцай

Прадстаўнікі Аб'яднанага пераходнага кабінета Беларусі, намеснік яго кіраўніцы Павел Латушка і прадстаўніца па сацыяльнай палітыцы Вольга Зазулінская звярнуліся да беларусаў з нагоды хуткага прыбыцця вызваленых палітвязняў у Варшаву.

Аўтобусы, якімі вязуць палітвязняў. Фота Дзяніса Кучынскага

Паведамляецца, што вызваленыя рэжымам Лукашэнкі 13 снежня і дэпартаваныя ва Украіну палітвязні прыбудуць у Варшаву ў Цэнтр беларускай салідарнасці па адрасе: Oleandrów 6, 00‑636 Warszawa.

Дакладны час прыбыцця абяцаюць паведаміць адразу пасля таго, як адбудзецца перасячэнне ўкраінска-польскай мяжы. 

Папярэдне прыбыццё ў Варшаву чакаецца ўначы ці нават раніцай наступнага дня.

«Мы звяртаемся да беларусаў і беларусак, да журналістаў і да ўсёй грамадскасці з просьбай быць уважлівымі і асцярожнымі. Важна памятаць, што не для ўсіх сёння свята: побач застаюцца сем’і, чые родныя ўсё яшчэ знаходзяцца за кратамі.

Людзям, якія выходзяць на волю, патрэбны час на аднаўленне, прастора без ціску і павага да асабістых межаў. Кожны з іх мае права сам вызначаць, калі і як гаварыць пра перажытае.

Наша агульная адказнасць — сустракаць вызваленых з падтрымкай і чалавечай годнасцю», — адзначаюць Латушка і Зазулінская.

Каментары да артыкула