Жыхарам гомельскага дома, які пацярпеў ад выбуху газу, дазволілі вярнуцца дахаты
Жыхарам першага і другога пад’езда шматпавярховага дома ў Гомелі, які пацярпеў ад выбуху, дазволілі вярнуцца ў свае кватэры. Таксама дадому могуць вяртацца жыхары шостага пад’езда суседняга дома.
Пашкоджаны дом на вуліцы Косарава, 3. Фота: МНС
Як паведаміў старшыня Гомельскага гарвыканкама Уладзімір Прывалаў, засяленне павінны было пачацца ўвечары 24 снежня з 18:30. Гаворка ідзе пра дом №3 на вуліцы Косарава і шосты пад’езд дома №5 па той жа самай вуліцы.
Выбух газу адбыўся 17 снежня ў адной з кватэр трэцяга пад’езда дзесяціпавярховага дома. У выніку абрынуліся перакрыцці паміж сёмым і восьмым паверхамі. 22 снежня падчас разбору завалаў на шостым паверсе было знойдзена цела загінулай жанчыны.
На час дэмантажных і аварыйных работ жыхароў першага і другога пад’езда пацярпелага дома, а таксама шостага пад’езда суседняга будынка часова адсялілі.
Чытайце таксама:
Стала вядома, калі ў Гомелі пачнуць дэмантаж часткі дома, пацярпелага ад выбуху газу
У Гомелі дэмантуюць верхнія паверхі 10‑павярховага дома, які пацярпеў ад выбуху
Дзяржаўныя медыя не кажуць пра ахвяр выбуху ў Гомелі, каб не было негатыву ў дні УНС?